Almatyda 2025 jyldyń sońyna qaraı dızelmen júretin avtobýstar bolmaıdy
«Prezıdent jasyl dálizder – qalany ózender men kósheler boıymen kógaldandyrý, ekologııalyq kólik túrlerine kóshýdi qoldap, tapsyrma berdi. 2025 jyldyń sońyna deıin bizde dızelmen júretin birde-bir avtobýs bolmaıdy. Sonymen qatar, jel ekpini máselesin sheshemiz. Qazir ınstıtýttar men ǵalymdar ońtaıly sheshim tabýmen aınalysyp jatyr. Eń bastysy, eger tıimdi ekologııalyq kólik bolsa ári jylytý maýsymynda kómirden jáne qatty otynnyń basqa túrinen arylsaq, onda qaladaǵy jaǵdaıdy aldaǵy 3 jylda jaqsartamyz dep oılaımyn», - dedi qala ákimi.
Ákimdik málimetinshe, «jasyl dálizderdi» qurý jónindegi is-qımyl jospary Dúnıejúzilik bankpen birlesip ázirlenip jatyr. Osy bastamalar aıasynda jalpyǵa qoljetimdi jasyl keńistiktiń úzdiksiz tizbegin qalyptastyrý, sondaı-aq Almaty aglomeratsııasynyń aýmaǵyndaǵy ózender men kanaldar arnasy boıyndaǵy kógaldandyrylǵan aýmaqtardy ulǵaıtý josparlanǵan.
Memleket basshysy Qasym-Jomart Toqaev byltyr Almaty jurtshylyǵymen kezdesýinde eskirgen jáne ekologııalyq jaǵynan kóp zalal keltiretin kólik túrlerinen bas tartý kerek ekenin aıtqan bolatyn.
«2025 jyldan keıin Almaty kóshelerinde dızel otynymen júretin avtobýstar qalmaýy kerek, ıaǵnı onyń ornyna gazben júretin jáne elektr qozǵaltqyshy bar qoǵamdyq kólikter qatynaıdy. Tranzıttik júk tasymalynyń basym bóligin Úlken Almaty aınalma jolyna kóshirý de qalaǵa oń áserin tıgizedi», - dedi sol kezde Qasym-Jomart Toqaev.