Almatyda 2024 jylǵa qaraı balalardy tegin qosymsha bilimmen qamtý deńgeıi 85% jetedi – Ásem Núsipova
«Oqýshylar saraıyn jańǵyrtýdyń birinshi kezeńi aıaqtaldy. Ol jańa ınnovatsııalyq ǵylymı-tehnıkalyq baǵyttardy iske qosý arqyly óz qyzmetin keńeıtti. Mysaly, almatylyq oqýshylar úshin Raketa jasaý ortalyǵy men Aerotsentr, planetany zertteý, VR jáne dronmen basqarý zerthanasy, fızıka, hımııa, bıologııa jáne gıdroponıka, robototehnıka, IT baǵdarlamalaý boıynsha ǵylymı zerthanalar sııaqty salalarda 25 jańa úıirme ashyldy. Búgingi tańda 10 myńǵa jýyq balanyń óz qyzyǵýshylyǵy boıynsha úıirmelerge, jáne sektsııalarǵa qatysý múmkindigi bar.
Qoldanystaǵy Oqýshylar saraıyn jańǵyrtý jumystary belsendi túrde jalǵasatyn bolady. Bıylǵy jyldyń ekinshi kezeńinde úlken kontsert zaly, qysqy baq pen mýzyka bólimi qaıta jóndeýden ótedi. Observatorııany qaıta qurý úshinshi kezeńge – 2023 jylǵa josparlanǵan, óıtkeni, seısmıkalyq kúsheıtý boıynsha tyńǵylyqty jumystar men memlekettik saraptama qajet, oǵan daıyndyq sharalary bastalyp ketti», - dedi Ásem Núsipova.
Sondaı-aq ol Memleket basshysyna qaladaǵy qosymsha bilim berýdiń basqa da baǵyttarynyń damýy týraly qysqasha habardar etkenin jazdy.
«Máselen, qazirgi tańda jergilikti bıýdjet esebinen Alataý, Naýryzbaı aýdanynda eki zamanaýı ınnovatsııalyq shyǵarmashylyq ortalyq salynyp jatyr. Búgingi tańda mekteptegi sport alańdaryn qaıta jańǵyrtý jumystary júrgizilýde, bul maqsatqa 1 mlrd teńge bólindi. Ákimdik jas natýralıster stantsııalaryn jańǵyrtýǵa daıyndalýda. 2023 jyly 3 oqýshynyń úıin jóndeý jumystary josparlanyp otyr, qazirgi ýaqytta jobalaý jumystary júrgizilýde. Sonymen qatar, qosymsha bilim berýge memlekettik bilim berý, shyǵarmashylyq jáne sporttyq tapsyrystar ornalastyryldy (osy jyly josparlanǵan balalardy qamtý 150 000, bul mektep oqýshylarynyń jalpy sanynyń 50%). Qabyldanǵan sharalardyń arqasynda biz 2024 jylǵa qaraı balalardy tegin qosymsha bilimmen qamtýdy 85% jetkizýdi josparlap otyrmyz»,- dedi qala ákiminiń orynbasary.
Onyń aıtýynsha, Memleket basshysy Oqýshylar saraıynda bıologııa jáne neırotehnologııa, gıdroponıka, 3D modeldeý jáne robototehnıka zerthanalaryn, sondaı-aq, anımatsııa, dybys jazý jáne bilim berý medıa jobalaryna arnalǵan stýdııalardy aralady.
«Memleket basshysy balalarymyzdyń jattyqtyrýshylar men ustazdarynyń deńgeıin joǵary baǵalady. Mysaly, bıotehnologııa úıirmesin Máskeý fızıka-tehnıkalyq ınstıtýtynyń túlegi Tımýr Berǵalıev júrgizedi. Ol Memleket basshysyna stýdenttermen sabaqtyń úzindisin kórsetti, sabaq barysynda ol adam bıosıgnaldaryn óńdeý jáne ınterpretatsııalaý negizderi týraly aıtty. Medıtsınada, sportta, adam densaýlyǵyn baqylaýda, protezdeý tehnologııalarynda, reabılıtatsııada qoldanýǵa bolady.
Almatydaǵy jastar robototehnıka qozǵalysynyń jetekshisi Vladımır Raıs erikti jattyqtyrýshy bolyp tabylatyn 3D prototıpteý zerthanasynyń sabaǵy da Memleket basshysyna úlken áser qaldyrdy.
Sabaqtarda balalar 3D basyp shyǵarý úshin ońtaılandyrylǵan úlgilerdi jasaý protsesterin úırenedi. Nátıjesinde balalardyń aýqymdy oılaýy men jobalaý daǵdylary damıdy.
Munda balalar Arduino – álemdik standartty platforma negizindegi robototehnıkany da oqıdy. Ol balalardyń elektronıka negizderimen tanysýyn jáne DIY qaýymdastyǵyna qatysýyn jeńildetý úshin arnaıy jasalǵan.
Sondaı-aq Memleket basshysy jyl muǵalimi – Daryn Saıynovpen sóılesti, ol fızıka páninen jańa formattaǵy dáristiń úzindisin sensorlyq ekran men elektrondy «assıstentterdi» – sýfler, ekrandar arqyly óte qoljetimdi túrde oqydy, ártúrli grafıkterdi, formýlalardy jáne siltemelerdi júktep alýǵa bolady»,- dedi qala ákiminiń orynbasary Ásem Núsipova.
Eske salsaq, Memleket basshysy jumys saparynyń baǵdarlamasyna sáıkes Almaty qalasyndaǵy Oqýshylar saraıyna bardy.