Almatyda 2017 jylǵy Ýnıversıadanyń ortalyq nysany - 12 myń oryndyq Muz saraıynyń qurylysy aıaqtaldy (FOTO)
Aıta ketý kerek, atalǵan sporttyq nysan bıýdjet qarjysy 32 mlrdtan 17 mlrd teńgege qysqarǵanyna qaramastan, merziminen buryn, 3 aı erte paıdalanýǵa berilip otyr. Qazir retteý jumystary ǵana júrgizilýde. Qurylys kezinde Qazqamtýdyń úlesi 60% quraǵan. Bul týraly Almaty qalasynyń ákimine jumys sapary barysynda habarlandy.
Sport nysanynda kógaldandyrý men abattandyrý jumystarynyń negizgi kezeńi aıaqtalǵan. Muz saraıyna kire beristegi alańda aǵashtar otyrǵyzylyp, gúlder egilip, jasyl jelek tóselgen. Іrgeles aýmaq, shahardyń birińǵaı jobasy boıynsha ulttyq naqyshta kómkerilgen. Máselen, shaǵyn sáýlet formalary, qoqys jáshikteri, oryndyqtar etnıkalyq oıý-órnektermen bezendirilgen.
Esterińizge sala keteıik, osy jyldyń aqpan aıynda Memleket basshysy N.Á.Nazarbaev Ýnıversıada boıynsha kezdesý ótkizip, iri sporttyq sharany ótkizý, qalanyń damýyna jańa serpin berip, sáýlet kelbeti, qonaq úı, meıramhana, qoǵamdyq kólik pen sporttyq nysandardaǵy qyzmet túrlerin jaqsartatynyn aıtqan. Sondaı-aq, sporttyq nysandardyń barlyǵy halyqqa qoljetimdi bolýy kerektigine nazar aýdarǵan.
Máselen, 12 myń oryndyq Muz saraıy, ámbebap muz aıdyny men kórermenderge arnalǵan oryndary bar sporttyq keshen bolyp tabylady. Bul jerde shaıbaly hokkeı, mánerlep syrǵanaý, short-trekten oqý-jattyǵý jumystaryn ótkizýge bolady. Jáne de mádenı sharalardy, halyqtyń muz aıdynynda buqaralyq syrǵanaýyn uıymdastyrǵa bolady. Keshen úsh bloktan turady; «A» bloky - ámbebap 12 myńdyq muz aıdyny, «B» bloky - saýyqtyrý kesheni bar jattyǵý aıdyny jáne «V» bloky - júzý basseıni.
Budan bólek, qala basshysyna Ýnıversıada nysandarynyń barlyǵy ýaqytysynda paıdalanýǵa beriletini habarlandy. Qazirgi ýaqytta Alataý aýdanynda ornalasqan 5 myń oryndyq Atletter qalashyǵy men Medeý aýdanyndaǵy 3 myńdyq Muz arenasynyń qurylystary qarqyndy júrgizilýde.
Eske sala ketsek, Almaty qalasyndaǵy halyqaralyq qysqy stýdentter oıyny 2017 jyldyń 29 qańtary men 8 aqpan aralyǵynda ótedi. Oǵan 60-tan astam elden 2000 sportshy keledi dep josparlanǵan. Jarysqa 3 myń erikti jumyldyrylmaq. Saıystar, 8 sporttyq nysanda, 12 sport túrinen ótedi.