Almatyda 2017 jylǵy qysqy Ýnıversıadany ótkizýge 5 myń adam jumyldyrylady

ALMATY. QazAqparat - Almatyda 2017 jyly ótetin búkilálemdik qysqy Ýnıversıadany ótkizýge barlyǵy 5 myńdaı adam jumyldyrylady. Olardyń ishinde uıymdastyrý komıtetiniń qyzmetkerleri jáne eriktiler bar. Volonterler áli de qabyldanyp jatyr. Bul týraly búgin Almatyda Ýnıversıadaǵa daıyndyq aıasynda otandyq ónim óndirýshilermen yntymaqtasý forýmy barysynda Ýnıversıadany uıymdastyrý komıtetiniń dırektory Áset Ábdýálıev málim etti.

Sonymen qatar onyń aıtýynsha, Almaty Ýnıversıadasy álemniń 80 eline translıatsııalanatyn bolady.

«Ýnıversıada oıyndaryn on kún ishinde kún saıyn 1 mlrd. jýyq adam tamashalaıtyn bolady. Bul jerde biz álemniń eń iri kompanııalarymen yntymaqtasatyn bolamyz», - dedi Á.Ábdýálıev.

Budan basqa, ol Ýnıversıada aıasynda snoýbordtyń naqty qaı tarmaǵy boıynsha jarys ótetindigin naqtylady.

«Snoýbordtyń «hafpaıp» degen páni bar. Biraq ony ótkizýge bizge 2 mlrd. teńge kerek. Bul úshin jer qazý jumystary júrgiziledi, ıaǵnı shyǵyny kóp. Sondyqtan biz ony «bıg-eır» degen túrine aýystyrdyq. Bul jańa oıyn Ýnıversıada aıasynda jáne qalamyzda tuńǵysh ret ótkizileıin dep otyr. Bıg-eır - óte qyzyqty jáne óte ádemi oıyn. Onda snoýbordshy arnaıy tuǵyrdan sekirip áýede ár túrli akrobatıkalyq elementter oryndaıdy. Osy oıyn úshin qala ortalyǵynda arnaıy alań belgilenip, ol jerge ýaqytsha konstrýktsııa ornatylatyn bolady. Qala turǵyndarynyń kelip tamashalaýyna óte qolaıly. Ázirge ýaqytsha qurylymnyń qaı jerge ornatlatyndyǵy belgilengen joq. Barlyq qurylys jumystarynyń baǵasy 200 myń eýrony quraıdy. Hafpaıpqa qaraǵanda anaǵurlym arzan», - dedi Á.Ábdýálıev.

Esterińizge sala ketelik, Ýnıversıada oıyndary Almaty qalasynda 2017 jyly 28 qańtar men 8 aqpan aralyǵynda 8 sport nysanynda sporttyń 13 túrinen ótetin bolady. Olar: mánerlep syrǵanaý, short-trek, taý shańǵysy, snoýbord, bıatlon, shańǵy jarysy, shaıbaly hokkeı, kerlıng, shańǵymen tuǵyrdan sekirý, shańǵy qossaıysy, konkı jarysy, frıstaıl jáne dopty hokkeıdiń kórneki túri.