Almatyda 20 myńǵa jýyq jasósipirim Pfizer vaktsınasyn saldyrdy

ALMATY. QazAqparat - Almaty qalasynda bir táýlikte 3522 adam koronavırýsqa qarsy vaktsına saldyrdy. Bul týraly qalalyq qoǵamdyq densaýlyq saqtaý basqarmasy málim etti, dep habarlaıdy QazAqparat tilshisi.

«23 jeltoqsan kúni 3522 almatylyq vaktsına saldyrdy. Vaktsına saldyrǵandar sany boıynsha Almaty qalasy aldyńǵy orynda. Bıylǵy jyldyń 1 aqpany men 23 jeltoqsan aralyǵynda qalada 1 043 094 turǵyn vaktsınanyń birinshi komponentin, 1004 601 adam ekinshi komponentin saldyrǵan. Onyń ishinde 123 024 adamnyń jasy 60-tan asqan»,- dep habarlady basqarmadan.

Búgingi tańda Pfizer (Comirnaty) kompanııasynyń ekpesin 26 823 adam saldyrdy. Onyń ishinde 1485 júkti áıel, 5369 bala emizetin ana jáne 19969 jasóspirim bar.

Qalada 132 pýnkt jumys istep tur. 756 adamnan turatyn 201 egý brıgadasy bar.

«Qazir medıtsına uıymdarynda, mektepterde, mádenıet, sport obektilerinde, bazarlar men qalanyń SOSO-da vaktsınatsııa pýnkti jumys isteıdi», - dep naqtylady densaýlyq saqtaý basqarmasynyń baspasóz qyzmeti.