Almatyda 20-29 jas aralyǵynda koronavırýs juqtyrǵandardyń sany joǵary

ALMATY. QazAqparat – Almatyda ótken onlaın brıfıng barysynda qalalyq Taýarlar men qyzmetterdiń sapasy men qaýipsizdigin baqylaý departamentiniń basshysy Jandarbek Bekshın qaladaǵy epıdemıologııalyq ahýal týraly aıtty, dep habarlaıdy QazAqparat tilshisi.

Onyń aıtýynsha, qazir Almatyda 8259 adam vırýs juqtyrǵany anyqtaldy. Onyń ishinde 5480 adamda sımptomdary bolsa, 2799 adamda eshqandaı belgisiz ótip jatyr.

«Onyń ishinde kóbinese koronavırýs juqtyrǵandardyń jasy 20-29 aralyǵynda. Olardyń úles salmaǵy 19,3 bolyp otyr. 30-39 jastaǵy adamdar arasynda 13,1 paıyz, qaýip toby bop sanalatyn qart kisiler arasynda 7,7 paıyz qurap otyr», - dedi J.Bekshın.

Bas sanıtarlyq dárigerdiń aıtýynsha, kóbinese bul jastardyń jaýapkershiliginiń joqtyǵyn bildirip otyr.

«Bizdiń eń birinshi aýrýlardyń taralý sebebi jastar arasynda áleýmettik qashyqtyqty saqtamaý, maska kımeý kóp kezdesedi. Jáne jastar shoǵyrlanyp júredi. Sol úshin olar úlken kisilerdiń ómirine qaýip tóndiredi. Olar ózderi jeńil aýyryp turýy múmkin. Al úlken kisilerge bul óte qaýipti. Qart kisilerge úıde otyryp, eshqaıda shyqpaý kerek», - dedi Bekshın.