Almatyda 2 shildede turǵyn úı sertıfıkattaryn alýǵa ótinim qabyldaý bastalady
Almaty ákimdigi qaıtarymsyz turǵyn úı sertıfıkattaryn berýge 2 mlrd teńge bóldi. Bul týraly onlaın brıfıng barysynda qalalyq Turǵyn úı saıasaty basqarmasynyń basshysy Danııar Qyryqbaev málim etti.
Spıkerdiń aıtýynsha, bul soma 2 myń almatylyqtyń «Otbasy bankinen» jeńildetilgen ıpoteka alý úshin bastapqy jarnanyń bir bóligin jabý úshin jetkilikti.
Sondaı-aq, Danııar Qyryqbaev turǵyn úı sertıfıkaty «Nurly jer» memlekettik baǵdarlamasy aıasynda «Shańyraq» jáne «Baqytty otbasy» baǵyttary boıynsha tegin ári qaıtarymsyz negizde 1 mln teńge mólsherinde áleýmettik kómek túrinde beriletinin atap ótti.
«Sertıfıkattardy kezekte turǵan 1 men 2 toptaǵy múgedekter, múgedek balalary bar nemese olardy tárbıelep otyrǵan otbasylar, jetim balalar men ata-anasynyń qamqorlyǵynsyz qalǵan balalar jáne kópbalaly otbasylar alady», – dedi Turǵyn úı saıasaty basqarmasynyń basshysy.
«Sertıfıkat alý úshin «Otbasy bankte» aldyn ala tólem qabilettilikten ótken azamattar belgilengen nysandaǵy qujattar men ótinishpen Almaty qalasynyń Turǵyn úı saıasaty basqarmasyna júginedi. Úsh jumys kúni ishinde qujattardyń durystyǵy men mártebeńizdiń sertıfıkat berý sharttaryna sáıkestigi tekseriledi», – dedi ol.
Qajetti qujattar tizimi mynandaı:
- nysan boıynsha ótinish;
- ótinish berýshi men otbasy músheleriniń jeke basyn kýálandyratyn qujat;
- sońǵy 6 aıdaǵy tabysy týraly anyqtama;
- jumys ornynan anyqtama;
- Bankten turǵyn úı zaemyn berýdi maquldaǵan hat.
Turǵyn úı sertıfıkaty turǵyn úı zaemyn berýge maquldaý alǵan ári tabysy boıynsha talapqa sáıkes keletin azamattarǵa beriledi: sońǵy jarty jyldaǵy tabysy otbasynyń árbir múshesine aıyna 106 336 teńgeden aspaýy tıis.
Turǵyn úı saıasaty basqarmasynyń basshysy ákimdiktiń turǵyn úı sertıfıkatynyń maquldanǵan somasyn «Otbasy banktegi» kezekte turǵandardyń jınaq shotyna aýdaratynyn aıtty.
Bank soma túskennen keıin sertıfıkat ıesimen qaryz shartyn nemese ıpotekalyq shart jasaıdy. Turǵyn úı sertıfıkatynyń somasyn aýdarýdyń maksımaldy ýaqyty maquldaý habarlamasyn alǵannan keıin 5 jumys kúndi quraıdy.
Almatyda turǵyn úı sertıfıkattaryn alýǵa úmitkerler kóp.
Turǵyn úı saıasaty basqarmasynyń aıtýynsha, búginde qalada 9 313 azamat baspanaǵa muqtaj. Olardyń ishinde 1 men 2 toptaǵy 2 758 múgedek, múgedek bala tárbıelep otyrǵan otbasy sanatyna jatatyn 1 462 adam, 1 890 jetim jáne ata-anasynyń qamqorlyǵynsyz qalǵan balalar, 3 203 kópbalaly otbasy bar.
Turǵyn úı saıasaty basqarmasy turǵyn úı sertıfıkattaryn alǵysy keletin azamattarǵa konsýltatsııalyq kómek kórsetýge daıyn.
Qazirgi ýaqytta Almaty qalasynyń Turǵyn úı saıasaty basqarmasy Dostyq 85/Abaı 1 mekenjaıdaǵy áleýmettik qyzmetter úıinde ornalasqan.