Almatyda 2 protsenttik ıpoteka qalaı beriledi

ASTANA. QazAqparat - Turǵyn úı qurylys jınaq banki Almaty qalasynda kópbalaly otbasylarǵa 2 protsenttik ıpotekany berýge qatysty túsinikteme berdi. Prezıdenttiń tapsyrmasy aıasynda «Nurly jer» baǵdarlamasyna ózgerister áli engizilmese de, qala ákimdigi «Baqytty otbasy» jobasy aıasynda kezekte turǵan kópbalaly otbasylarǵa jeńildetilen ıpotekany berýdi kózdeıdi, dep habarlaıdy QazAqparat tilshisi.

«Negizi, Almaty qalasynyń ákimdigi atalǵan jobany burynnan beri ázirlep jatyr. Ol bastama Prezıdenttiń tapsyrmasymen sáıkes keldi deýge bolady. Negizi, qazirgi kezde «Nurly jer» baǵdarlamasyna ózgerister engizilip jatyr. Sonyń aıasynda Qazaqstannyń barlyq kópbalaly otbasylary jáne taǵy birneshe sanatqa jatatyn azamattar jeńildetilgen ıpoteka alatyn bolady. Al Almaty ákimdigi óz bıýdjetinen qosymsha qarjy bólip, ony aımaqtyq deńgeıde bastap ketti. «Baqytty otbasy» tek Almaty qalasynyń kópbalaly otbasylaryna arnalǵan. Ony baǵdarlama emes, bıýdjettik nesıelendirý dep ataıdy», - deıdi Turǵyn úı qurylys jınaq banki baspasóz qyzmetiniń mamandary.

Bıýdjettik nesıelendirý aıasynda kópbalaly otbasylarǵa Turǵyn úı qurylys jınaq banki arqyly 2 protsenttik ıpoteka beriledi. Zaımdy 15 mıllıon teńgege deıin alýǵa múmkindik bar. Ony alý úshin 10 protsenttik alǵashqy jarnany quıý qajet. Biraq kópbalaly otbasylarǵa bıýdjettiń esebinen 1 mıllıon teńge kóleminde turǵyn úı kýálikteri beriledi. Sony alǵashqy jarna retinde qoldanýǵa bolady.

«Búginde Almatyda bir myńnan astam kópbalaly otbasy baspana kezeginde tur. «Baqytty otbasy» jobasy dál osy azamattarǵa jeńildetilgen nesıeler beriletin bolady. Qazirgi kezde baqytty-otbasy.kz saıtynda ótinish berýge bolady. Onymen Almaty qalasynyń ákimdigi aınalysyp jatyr. Olar qujattardy jınaıdy da, tizimdi jasap shyǵady. Negizi, qazirgi baspana kezegi bar ǵoı. Onda 1 276 adam tirkelgen. Endi, olar qatysamyz dep, óz ótinishterin berýi kerek. Sol boıynsha tizim jasalady. Turǵyn úı qurylys jınaq banki soǵan qarap, árbir otbasynyń tólemqabilettiligin tekseredi de, 2 protsenttik ıpotekany beredi», - dep atap kórsetti bank qyzmetkerleri.

Turǵyn úı qurylys jınaq banki «Baqytty otbasy» jobasyna qatysatyn kópbalaly otbasylardyń tólemqabilettiligin jeńildetilgen tártippen teksermekshi. Qatysýshy adam ıpotekanyń aı saıynǵy tólemaqysyn aýdara alatynyn rastasa boldy. Balalarǵa ketetin shyǵyndar eskerilmeıdi. Máselen, 15 mıllıon teńgeniń páteri úshin aı saıyn 79 000 teńge tóleý kerek.

Budan bólek, baspanany jańa páterler naryǵynan satyp alý qajet. Ol úshin bir aı beriledi. Kópbalaly otbasy osy ýaqyttyń ishinde páter taba almasa, ıpoteka kezekti turǵan basqa adamǵa beriledi.

Aıta keteıik, buǵan deıin QazAqparat «Baqytty otbasy» boıynsha qujat qabyldaý naýqanynyń bastalǵanyn habarlaǵan bolatyn. «Baqytty otbasy» baǵdarlamasynyń resmı saıtynda bıýdjettik ıpotekany alýdyń barlyq sharttary, tapsyrylatyn qujattardyń tizimi men ótinim berý joldary kórsetilgen. Ótinishti portal arqyly berýge bolady. Ol úshin adamda elektrondyq tsıfrly qoltańba bolýy shart.