Almatyda 2 myńnan astam adam úıde daýys berdi
Spıkerdiń sózinshe, jabyq saılaý ýchaskelerinde 12 381 saılaýshy daýys berdi. Aldyn ala ótinish jazǵan 2295 azamat úıinde daýys berýge ótinish bildirgen. Almatydaǵy saılaý ýchaskelerinde 3 myńnan astam ulttyq jáne 43 halyqaralyq baqylaýshy jumys istep jatyr.
Janna Asanova saılaý komıssııasynyń zańǵa sáıkes hattamany kimge berýge quqyǵy bar ekenin taǵy da túsindirdi.
«Zańda daýystardy sanaýǵa qatysqan baıqaýshynyń, senimdi tulǵalardyń daýys berý nátıjeleri týraly hattamany usyný tártibi belgilengen, hattama saılaý komıssııasynyń stendterine de ilinedi. Hattamany BAQ ókilderine berý zańda qarastyrylmaǵan», - deıdi Janna Asanova.
Sondaı-aq, baspasóz máslıhaty barysynda Janna Asanova saılaýshylardyń saılaý bıýlletenin jáshikke salar aldynda sýretke túsirip alýy keń taraǵan jaǵdaıǵa qatysty pikir bildirdi. Mundaı jaǵdaı búgin №55 orta mekteptegi №72 saılaý ýchaskesinde oryn aldy.
«Bul áreket pen úgit júrgizýdiń ara-jigin ajyratyp alý kerek, eger saılaýshy bıýlletendi jáshikke salmaı turyp sýretke túsirip alsa jáne ony eshqaıda jarııalamasa, bul zań buzýshylyq emes. Estelik úshin sýretke túsirýge bolady, biraq eger adam belgili bir kandıdatty tańdaǵanyn kórsetip, ony qoldap bıýlletendi jarııalasa, bul basqa másele. Sondyqtan bul jerde úlken aıyrmashylyq bar», - dep túsindirdi Janna Asanova.