Almatyda 19 jańa ǵımarat kommýnaldyq menshikke berildi
Onyń aıtýynsha, úsh mektep, alty kópqabatty úı, jedel járdemniń qosalqy stansasy, psıhıatrııalyq aýrýhana ortalyǵynyń qosymsha aımaqtary, ýchaskelik polıtsııa beketteri men saýda pavılony Almaty ákimdiginiń kommýnaldyq menshigine aınaldy.
Aıta keterligi, qabyldanǵan 19 obektiniń jalpy quny 12 mlrd 245 mln teńge.
«Bul – jańadan salynǵan nysandar. Olardyń ishinde «Mamyr-1» shaǵynaýdanyndaǵy 1200 oryndy jańa mektep ǵımaraty, sondaı-aq №123 jáne 164 mektepterdiń qosalqy ǵımarattary bar. Sonymen qatar úsh jańa densaýlyq saqtaý nysany salyndy. Olar – patologoanatomııa bıýrosy, jedel járdemniń qosalqy stantsııasy, psıhıatrııalyq aýrýhana ortalyǵynyń keńeıtilgen aımaqtary. Alty kóppáterli turǵyn úı kommýnaldyq turǵyn úı qoryna qosý úshin Turǵyn úı saıasaty basqarmasyna, alty ýchaskelik polıtsııa pýnkti Almaty Polıtsııa departamentiniń balansyna, bir saýda pavılony Týrızm basqarmasyna berildi», - dedi spıker.
Sonymen qatar, 75 jyljymaıtyn múlik obektisi respýblıkalyq menshikten kommýnaldyq menshikke berildi.
Bul tizimde Turǵyn úı saıasaty basqarmasyna jekeshelendirý úshin brilgen 53 páter, Almaty temirjol aýrýhanasy, №9 Oqýshylar úıine bir ǵımarat, Jetisý aýdanyndaǵy balalarǵa arnalǵan ortalyq ashýǵa arnalǵan ǵımarat, Polıtsııa bóliminiń emhanasy, Arnaıy jedel otrıadtyń vzvody ornalasatyn bir ǵımarat jáne basqalary bar.
Basqarma basshysy jalpy quny 99,8 mln teńge bolatyn úsh nysan syılyq kelisimi boıynsha qabyldanǵanyn aıtty.
«Bul Almaly aýdanyndaǵy «Arka» óner obektisi, sonymen qatar M.Tólebaev kóshesi 25/18 mekenjaıdaǵy ǵımarat, ol qazir daıyndyq synyptaryn ashý úshin bilim basqarmasyna bekitilgen. Al úshinshi obekt - Amangeldi kóshesi, 68A ǵımaraty, onda «Baým toǵaıynyń» jáne ony jasaýshylardyń tarıhyna arnalǵan murajaı ekspozıtsııasyn qurý josparda. Sonymen qatar gerbarıı qory bolady. Ǵımarat «Medeý» MATP balansyna berildi»,- deıdi ol.