Almatyda 18 myńnan astam búldirshin balabaqsha kezeginde tur

ALMATY. QazAqparat- Almatyda 2023 jyldyń sońyna deıin 6255 oryndyq 80 balabaqsha ashylady. Bul týraly óńirlik kommýnıkatsııalar qyzmetiniń brıfınginde qalalyq bilim basqarmasynyń basshysy Lázzat Jylqybaeva málimdedi, dep habarlaıdy QazAqparat tilshisi.

Spıkerdiń sózinshe, megapolıste barlyǵy 919 mektepke deıingi mekeme bar.

Onyń 194 memlekettik, 725 jeke balabaqsha. Oǵan 79 600 bala barady.

«Búginde 3 jastan 6 jasqa deıingi mektepke deıingi uıymdarǵa kezekte 18 118 bala tur.Osy máseleni sheshý úshin bıyl jergilikti bıýdjet qarajaty esebinen 6 255 oryndyq 80 balabaqsha, onyń ishinde 5395 oryndyq 75 jekemenshik balabaqsha jáne 860 oryndyq 4 memlekettik balabaqsha ashý josparlanǵan. Búgingi tańda 2 630 oryndyq 47 jańa balabaqsha ashyldy, onyń ishinde 300 oryndyq memlekettik balabaqsha jáne 46 jekemenshik balabaqsha bar», - dedi Lázzat Jylqybaeva.

Sondaı-aq bıyl jekemenshik balabaqshalarǵa jergilikti bıýdjet esebinen memlekettik tapsyrys boıynsha 5 000 orynǵa qarjy bólindi.

«Qazir 3801 orynǵa jekemenshik balabaqshalarda memlekettik tapsyrys ornalastyryldy. Jalpy memlekettik bilim tapsyrysy 40 995 orynǵa 635 jekemenshik mektepke deıingi uıymda ornalastyrylǵan. Osy sharalardyń nátıjesinde 3-6 jasar balalardy mektepke deıingi tárbıe jáne bilimmen qamtý – 93,5% qurady, jyldyń sońyna deıin bul kórsetkishti 95%-ǵa deıin ulǵaıtý josparlanǵan»,- dedi basqarma basshysy.

Budan basqa, 2023 jyldyń qyrkúıeginen bastap balabaqshada áleýmettik osal topqa jatatyn otbasynan shyqqan 5 myńnan astam bala tegin tamaqpen qamtamasyz etiledi.