Almatyda 150 myńnan astam adam áleýmettik jeńildik pen járdemaqy alady

NUR-SULTAN. QazAqparat – Ortalyq kommýnıkatsııalar qyzmetinde ótken brıfıngide Almaty qalasynyń ákimi Baqytjan Saǵyntaev áleýmettik járdemaqy alatyn turǵyndardyń sanyn atady, dep habarlaıdy QazAqparat tilshisi.

«Memleket basshysy óz Joldaýynda karantın jaǵdaıynda halyqtyń tabysyn saqtaýǵa basymdyq berdi. Búginde 156 myńnan astam almatylyq jeńildikter men járdemaqy alyp otyr. Osy úshin bıyl 25,7 mlrd teńge bólindi», - dedi Baqytjan Saǵyntaev.

Onyń aıtýynsha, Almatyda erekshe muqtajdyqtary bar 53 myńnan astam adam turady. Bıyl 24,7 myń múmkindigi shekteýli adamdy ońaltý quraldarymen, áleýmettik qyzmettermen qamtý úshin 4,9 mlrd teńge jumsalǵan.

«Jyl aıaǵyna deıin 2,6 mln sharshy metrden astam turǵyn úı paıdalanýǵa berilip, memleket bıýdjeti esebinen 3,9 myń páter salynady. Jyl basynan beri 3516 otbasy turǵyn úımen qamtamasyz etildi. «Shańyraq» ilki jobasy iske qosylǵanyn bilesizder. Bul joba 2114 otbasyn turǵyn úımen qamtamasyz etýge múmkindik berdi. «Almaty jastary» baǵdarlamasy boıynsha 910 otbasy, «Baqytty otbasy» baǵdarlamasy boıynsha - 431 otbasy, kommýnaldyq turǵyn úı qorynan - 61 otbasy páter aldy», - dedi ákim.