Almatyda 150 adamǵa toı ótkizgen birneshe meıramhana anyqtaldy

ALMATY. QazAqparat - Almatyda 4-7 maýsym aralyǵynda belgilengen shekteýlerdi buzǵan 36 jaǵdaı anyqtaldy. Demalys kúnderi monıtorıngilik toptar kúsheıtilgen rejımde jumys istedi, dep habarlaıdy QazAqparat tilshisi.

Almatyda monıtorıngilik top ókilderi maýsymnyń 4-inen 5-ine qaraǵan túni belgilengen shekteýdi buzǵan 19 jaǵdaıdy anyqtady. Atap aıtar bolsaq, Áýezov aýdanyndaǵy «Dostar saraıy» meıramhanasy 150 adamǵa arnalǵan úılený toıyn ótkizgen. Sol ýaqytta Bostandyq aýdanyna qarasty «Han Sarai» meıramhanasynda da toı boldy. Medeý aýdanynda «The Monkey» kafesinde 150-ge jýyq adam anyqtalsa, «Nebo» barynda 120-ǵa tarta qonaq jınalyp, zańbuzýshylyqqa jol bergen.

Al 5-6 maýsymda 14 jaǵdaı tirkeldi:

Naýryzbaı aýdanyndaǵy «Ilham» meıramhanasynda 150 qonaqqa eseptelgen saltanatty is-shara ótken.

Bostandyq aýdanynyń tekserýshileri «Hide Park» oıyn-saýyq parkiniń fýdkortynda 150-ge jýyq adamnyń jınalǵanyn anyqtady.

Medeý aýdanynda «Atmosfera» meıramhanasynda 150-ge jýyq kelýshi bolǵan. Sonymen qatar, «Leıd Naıd shoýda» 200 adam jınalǵan.

Jeksenbi kúni megapolıste 3 zań buzýshylyq tirkeldi:

«Dos» kompıýterlik klýbynda 40-qa jýyq adam otyrsa, Medeý aýdanyndaǵy «Pınta» barynda 100-ge jýyq turǵyn jınalyp, zańbuzýshylyqqa jol bergen.

Jalpy osy jyldyń 20 naýryzy men 7 maýsymy aralyǵynda belgilengen shekteýlerdi buzǵan 1088 jaǵdaı anyqtaldy.

Almaty ákimdigi qala turǵyndary men qonaqtaryn karantın rejımin qatań saqtaýǵa, juqtyrý qaýpin azaıtý maqsatynda saltanatty is-sharalarǵa, adam kóp jınalatyn jerden aýlaq bolýǵa shaqyrady.