Almatyda 1200 muqtaj janǵa onlaın ótinish boıynsha qurbandyq eti taratyldy
Barlyq qurbandyq eti 1200 muqtaj adamǵa taratyldy. Etti taratý úshin 80 volonter, 6 shaǵyn avtobýs, 30 jeńil avtokólik tartylǵan.
Qalanyń bas memlekettik sanıtar dárigeriniń qaýlysyna sáıkes, koronavırýs ınfektsııasyn taratpaý maqsatynda 31 shilde men 2 tamyz aralyǵynda birqatar sharalar qabyldanǵan.
- Menshik ıesine qaramastan, barlyq uıymdarda, sonymen birge, jekemenshik úı-jaılar men medreselerde adamdardyń jappaı jınalýymen ótetin sharalardy ótkizýge;
- Almaty qalasynyń aýmaǵynda avtokólik arqyly mal soıysyn uıymdastyrýǵa jáne soıýǵa, jáne jekemenshik úı-jaılarda mal satýǵa tyıym salynǵan.
Sonymen birge, belgilengen merzimde Almaty qalasynyń ortalyq meshiti bekitken onlaın rejımde qurbandyq shalýdy júzege asyratyn oryndardy qospaǵanda, mal satatyn tsehtar men bazarlardyń jumysy toqtatyldy.
Qaýlyny oryndaý maqsatynda din isteri jónindegi basqarma, polıtsııa departamentiniń JPQ, SES jáne veterınarlyq qyzmetkerlerimen meshitterde, bazarlarda, qaıyrymdylyq mekemelerinde, maı soıatyn tsehtarda jáne basqa oryndarda kezekshilik uıymdastyrylǵan.
«Qazaqstan musylmandary dinı basqarmasy habarlaǵandaı, 31 shilde kúni belgilenbegen oryndarda mal soıyp, ony satýdyń 14 faktisi anyqtaldy. Azamattardy sanıtarlyq talaptardy saqtaýǵa shaqyramyz, belgilenbegen orynda mal soıyp, ony satý koronavırýs ınfektsııasynyń taralýyna ákelýi múmkin. Barshańyzdy qoǵamdyq tártipti buzbaýǵa shaqyramyz» dedi ákimdikten.