Almatyda 110 soǵys ardagerine mereıtoılyq medaldar tabystaldy

ALMATY. Sáýirdiń 21-i. QazAqparat /Názıra Eleýhan/ - Búgin Almatyda Almaly aýdany ákimdigi osy aýdanda turatyn 110 ardagerge «1941- 1945 j.j. Uly Otan soǵysyndaǵy jeńiske 65 jyl» atty mereıtoılyq medaldardy saltanatty túrde tabystady,

dep habarlaıdy QazAqparat.

Saltanatty sharanyń ashylý saltanatynda sóz sóılegen Almaly aýdany ákiminiń orynbasary Manaphan Qanseıitov: «Sizderdiń aldaryńyzdaǵy urpaqtyq paryzymyzdy biz eshqashan umytpaımyz. Qaı kezde de aldyńǵy sapta júrip, beıbitshilik pen dostyqty, tatýlyqty uǵyndyryp, óskeleń urpaqqa tárbıe berýde ólsheýsiz úles qosyp kele jatqandaryńyz úshin alǵysymyzdy, sheksiz rızashylyǵymyzdy bildiremiz. Erlikterińiz úshin basymyzdy ıemiz», dedi.

Onyń aıtýynsha, búgingi kúni atalmysh aýdanda 3 661 ardager turady. «Búgin onyń 110-y keldi. Densaýlyǵyna, jastarynyń ulǵaıýyna baılanysty, tósek tartyp kele almaǵan ardagerlerimizdiń medaldaryn úılerine aparyp tabystaıtyn bolamyz. Osy aptanyń juma kúni, saǵat 11.00-de Almaly aýdanyndaǵy ár mektep birdeı ýaqytta 120 ardagerdi saltanatty jaǵdaıda quttyqtaıtyn bolady», dedi Almaly aýdany ákiminiń orynbasary Manaphan Qanseıitov.

«Osy kúnge jetkenime qýanyshtymyn. Ákimdikke de, Elbasyna da, Úkimetke de bizge barlyq jaǵdaıdy jasap jatqandaryna alǵysymyz sheksiz. Armanym joq. Tek, elimiz árqashan aman-esen bolsyn! Halqymyzǵa tatýlyq, birlik, mol qýanysh, dáýlet pen yrys tileımin! Jas urpaq, bolashaq elimizdiń týyn kókke kóterip, damyǵan elderdiń qataryna qosyla bersin!», dedi búgingi saltanatty sharaǵa kelgen Uly Otan soǵysynyń ardageri Jarmuhan Ájimurat.