Almatyda 100-shi jeke atqyshtar brıgadasy týraly kitaptyń tusaýy kesildi

ALMATY. QazAqparat – Almatyda tarıh ǵylymdarynyń kandıdaty, dotsent Naılıa Takıjbaevanyń «100-shi jeke atqyshtar brıgadasy» atty kitabynyń tusaýy kesildi. Avtordyń aıtýynsha, 100-shi jeke atqyshtar brıgadasy 1941 jyly jeltoqsan aıynda Almaty qalasynda qurylǵan, dep habarlaıdy QazAqparat tilshisi.

«Bul áskerı qurama ekinshi Rjev-Sychev, Velıkolýk, Nevel shabýyl operatsııalaryna qatysqan. Brıgadany «qazaq brıgadasy» dep ataǵan. Sebebi, onyń quramynda 86% qazaqtar, 11% orystar jáne 3% basqa ulttar bolǵan. Rjev-Sychev operatsııasy («Mars» operatsııasy) bastalǵanǵa deıin brıgadanyń jeke quramynda 4 770 adam bolsa, operatsııa aıaqtalǵan tusta 1 994 adam ǵana qalǵan. Búginde Reseıdiń Rjev qalasynda №5 mektep bar. Ol 100-shi jáne 101-shi atqyshtar brıgadasy jaýyngerleriniń esimimen atalady. Aıta keteıin, eger 100-shi jeke atqyshtar brıgadasy Almatyda qurylsa, 101-shi brıgada Aqtóbe qalasynda qurylǵan»

, - dedi Naılıa Takıjbaeva.

Ǵalym kitap jazý barysynda áskerı qolbasshylardyń maqalalary men memýarlaryn, Reseıdiń Qorǵanys mınıstrliginiń saıtyn paıdalanyp, Reseı men Qazaqstan muraǵattaryna barǵan. Sondaı-aq, muraǵat materıaldarynan Prezıdent Qasym-Jomart Toqaevtyń ákesi men aǵasyna qatysty tyń derekter tapqanyn aıtty.

«Prezıdenttiń ákesiniń aǵasy Qasym Boltaev maıdanda polıtjetekshi bolǵan. 22 jasynda birinshi Rjev-Sychev operatsııasynda qaza tapqan. 2009 jyly Qasym-Jomart Toqaev aǵasynyń qaıda jerlengenin anyqtady. Prezıdenttiń ákesi Kemel Toqaev ta maıdanǵa qatystqan. Ol úlken aǵasynyń qurmetine ulyna «Qasym» esimin berse, anasy oǵan «Jomart» degen esimdi qosady. Kemel Toqaevtyń ómirbaıanyn oqı otyryp, onyń 1942 jyly aqpan aıynda maıdanǵa attanǵanyn, tank desantyndaǵy avtomatshylardyń komandıri bolǵanyn bildim», - dedi tarıhshy.

Aıta keteıik, kitaptyń tusaý keser rásimi Dostyq úıinde ótken bolatyn. Oǵan Qazaqstan halqy Assambleıasy men etnomádenı birlestikterdiń ókilderi, jazýshylar, qala turǵyndary jáne oqýshylar qatysty.

Jıyn barysynda Almaty qalalyq ardagerler keńesi tóraǵasynyń orynbasary Serik Qurmanǵalıev, qoǵam qaıratkeri, Qazaqstan halqy Assambleıasynyń múshesi, «Parasat» ordeniniń jáne «Til janashyry» qurmet belgisiniń ıegeri Asyly Osman, «Ahyska» túrik etnomádenı birlestigi tóraǵasynyń orynbasary Shahısmaıl Asıev sóz alyp, jınalǵan qaýymdy kele jatqan Jeńis kúnimen quttyqtap, aq jarma tilekterin jetkizdi.

Eske salsaq, jýyrda shyqqan jańa basylymdardyń biri – «Roza Baǵlanova» kitap-albomy.