Almatyda 100 shaqyrymnan asatyn jańa jol salynady

ALMATY. QazAqparat - Almatynyń shetki shaǵyn aýdandarynda jol salý men jóndeý – erekshe baqylaýda. Bul týraly megapolıs ákimi Baqytjan Saǵyntaev Almaty telearnasyndaǵy tikeleı efır barysynda aıtty, dep habarlaıdy QazAqparat tilshisi.

Onyń aıtýynsha, bıyl Almatyda 100 shaqyrymnan asatyn jańa jol salý josparlanǵan.

«Almaty oblysynyń eldi mekenderiniń qalaǵa qosylýyna baılanysty qala aýmaǵy ulǵaıdy. Jol, sýmen jabdyqtaý, sý burý jelisi men balabaqsha, mektep, emhanalar salýǵa barlyq kúsh jumyldyryldy. Bul másele erekshe baqylaýda», - dedi ákim.

2021 jyly Alataý, Túriksib jáne Naýryzbaı aýdandaryndaǵy segiz shaǵyn aýdanynda jańa joldar salý josparlanyp otyr. Bular – Ójet, Shańyraq-5, Samǵaý, Nurshashqan, Quramys, Álmerek, Qaırat, Alǵabas shaǵyn aýdandary. Osy shaǵyn aýdandardaǵy 415 kóshede uzyndyǵy 108 shaqyrym jańa jol salynady.

Sonymen birge «Dýman» shaǵyn aýdanyndaǵy uzyndyǵy 30,5 shaqyrym bolatyn 53 kóshede kúrdeli jóndeý jumystary júrip jatyr. Onyń ishinde uzyndyǵy 5,6 shaqyrym bolatyn11 kóshede jumys aıaqtaldy. Qalǵan 42 kósheni aıaqtaý qyrkúıek aıyna josparlanǵan.

«Budan ózge, uzyndyǵy 227,5 shaqyrym bolatyn 225 kóshede jol jabynyn jóndeý qolǵa alyndy. Qazirgi kezde 66 kóshede jumys júrip jatyr. Onyń ishinde 12 magıstraldy jáne 54 jergilikti mańyzy bar kósheler»,- dedi Baqytjan Saǵyntaev.