Almatyda 1 mamyr merekesi qalaı toılanady

ALMATY. QazAqparat – Almatyda 1 mamyr – Qazaqstan halqynyń birligi kúnine arnalǵan negizgi merekelik is-sharalar «Respýblıka saraıy» aldyndaǵy Abaı alańynda ótedi, dep habarlaıdy QazAqparat tilshisi qala ákimdigine silteme jasap.

Kontsert «Jasstars» tobynyń jáne «Saltanat» bı ansambliniń oryndaýyndaǵy «Qazaqstan – dostyq besigi» vokaldyq-bı kompozıtsııasymen ashylady. Erbolat Qudaıbergenov, Rústem Nurjigit, Danııar Ótegen, Mádı Rymbaev, Dılnaz jáne Dılshat Ahmadıevter, Tóreǵalı Tóreáli, Dıdar Qaden, Aldaspan toby jáne taǵy basqalary óner kórsetedi dep josparlanýda.
Almaty – Shanhaı yntymaqtastyǵy uıymynyń 2023-2024 jyldardaǵy mádenı jáne týrıstik astanasy. Osyǵan oraı, halqymyzdyń birlik merekesi Tatarstan, Ózbekstan jáne Belarýstan kelgen qonaqtardy qarsy alady. Kontsertke halyqaralyq baıqaýlardyń laýreaty Zarına Hasanshına, Ózbekstannyń, Qaraqalpaqstannyń, Bashqurtstannyń halyq ártisi Jeńisbek Pııazov jáne Belarýs Respýblıkasynyń eńbek sińirgen artısi Janet Býterýs qatysady.

Merekelik kontserttiń jalǵasy retinde qazaq, armıan, koreı, kavkaz, túrik, uıǵyr, polıak ulttyq bıleri jáne Qazaqstannyń basqa halyqtarynyń bıi usynylady.

Dál osy kúni Abaı alańynda Qazaqstan halyqtarynyń taǵamdary festıvali ótedi, onda 15 meıramhana qazaq, koreı, grýzın, orys, uıǵyr jáne úndniń ulttyq taǵamdaryn usynady.
1 mamyr kúni saǵat 11.00-de Jibek Joly, Panfılov kóshelerinde jáne Ǵylym akademııasy ǵımaratynyń aldyndaǵy Sh.Ýálıhanov atyndaǵy skverde merekelik is-sharalar ótedi. Kontserttik baǵdarlamalar «Almaty áýenderi» ártisteriniń jáne «Alataý» dástúrli óner teatrynyń, Qazaqstan halqy Assambleıasynyń, mýzykalyq toptar men dı-djeılerdiń qatysýymen josparlanǵan.