Almatyda 1 mamyr kúni negizgi is-sharalar Abaı alańynda ótedi

ALMATY. QazAqparat - Almatyda 1 mamyr - Qazaqstan halqynyń birligi kúnine arnalǵan negizgi merekelik is-sharalar «Respýblıka saraıy» aldyndaǵy Abaı alańynda ótedi, dep habarlaıdy QazAqparat tilshisi qala ákimdigine silteme jasap.

Alańda merekelik kontsert uıymdastyrylady. Estrada juldyzdary men ulttyq-mádenı ortalyqtardyń shyǵarmashylyq ujymdary óner kórsetedi. Etnomádenı birlestikterdiń kórmesi ótedi.

Qazaqstan halqynyń birligi kúnine arnalǵan merekelik sharalar, sondaı-aq Mahatma Gandı atyndaǵy saıabaqta da uıymdastyrylady.

Qala turǵyndary men qonaqtary «Haıýanattar parkinde» qazaq memlekettik tsırkiniń kóshpeli shoý baǵdarlamasyn tamashalaı alady. Al, qýyrshaq teatrynda «Qýyrshaq dýman» spektakli bolady.

Velomaýsymnyń ashylýy aıasynda jappaı velojarys ótkizý de josparlanǵan.

Merekelik sharalar Almatynyń barlyq aýdanynda uıymdastyrylady.

Aıta ketsek, 1 mamyr kúni elordadaǵy sýburqaqtar iske qosylady.