Almatyda 1,3 mln adamdy koronavırýsqa qarsy egý josparlanǵan
Almaty ákimi orynbasarynyń pikirinshe, qazir vaktsınatsııa úshin eń qolaıly sát, qala turǵyndarynyń kópshiligi demalystan oraldy, mektep synyptary men joǵary oqý oryndarynyń aýdıtorııalary toltyryldy. Qala tolyqqandy jumys rejımine oraldy. Vaktsınatsııa indettiń qaıta órshýine jol bermeıdi.
Búginde Almatyda vaktsınatsııa júrgizý úshin medıtsınalyq uıymdarda, mektepterde, mádenıet, sport obektilerinde, bazarlarda jáne qalanyń saýda, oıyn-saýyq ortalyqtarynda 250 egý pýnkti daıyn. Onyń ishinde 160 pýnkt jumys isteıdi, quramynda 1028 medıtsına qyzmetkeri bar 237 egý brıgadasy jumys isteıdi.
E.Babaqumarov aqpan aıynda vaktsınatsııanyń birinshi kezeńi aıasynda medıtsına qyzmetkerleri, oqytýshylar men quqyq qorǵaý organdarynyń qyzmetkerleri, barlyǵy 3 myńnan astam adam vaktsına alǵanyn eske saldy.
«Sáýir aıynan bastap halyqty vaktsınalaýǵa kiristik. Bastapqyda Almatynyń resmı tirkelgen 2 mln turǵynynyń 1,2 mıllıonǵa jýyǵyn egý mindeti turdy.
Birinshi kezeńde 2 mıllıonnan astam turǵynnyń arasynan 18 jasqa deıingi 602 myń balany, 20551 júkti áıeldi, medıtsınalyq qarsy kórsetilimi bar 173 myń azamatty qospaǵanda, 1 090 103 adamdy vaktsınalaý mindeti turdy»,- dedi ol.
Búgingi tańda KVI-ge qarsy egýdiń birinshi komponentin vaktsınalaýǵa jatatyn 960 myńnan astam adam aldy, bul – 77% quraıdy, al ekinshi komponentti 873 myńnan astam turǵyn saldy.
«Pfizer vaktsınasynyń aldaǵy túsýin eskere otyryp, vaktsınatsııaǵa jatatyn halyqtyń sany 1,3 mln adamdy quraıdy, onyń ishinde 12-17 jastaǵy jasóspirimder men júkti áıelder bar. Osylaısha, ortaq kúsh-jigermen 300-400 myńdyq deńgeıdi eńseremiz degen úmit bar. Jappaı vaktsınalaý júrip jatqan elderdiń tájirıbesine sáıkes, ahýaldy turaqtandyrý úshin halyqtyń 90% nemese odan da kóbin vaktsınalaý qajet»,- dedi Almaty ákiminiń orynbasary.
«Ujymdyq ımmýnıtet qalaǵa burynǵy ómir yrǵaǵyna oralýǵa, ádettegi ómir saltyn qalpyna keltirýge jáne barlyq shekteýlerden arylýǵa múmkindik beredi. Vaktsınatsııanyń tıimdiligi týraly Almatyda koronavırýs ınfektsııasynyń tórtinshi tolqyny uzaqtyǵy boıynsha basqa óńirlerge qaraǵanda eki ese qysqa bolǵandyǵymen aıtýǵa bolady. Osy kezeńde halyq belsendi túrde vaktsınatsııalandy, táýligine 10 myńnan astam adam ekpe aldy. Bul halyqtyń KVI-ge qarsy ımmýnıtetin qalyptastyrýǵa múmkindik berdi»,- dedi E. Babaqumarov.
Vaktsınatsııa qarqyny týraly aıta kele, ákim orynbasary vaktsınalanbaǵan qala turǵyndarynyń basym kópshiligi aýyryp, reanımatsııada jatqanyn aıtty. Statsıonarlarǵa túskenderdiń jalpy sanynyń tek 0,03% KVI-ge qarsy vaktsına alǵan patsıentter quraıdy. Bul fakti ýaqytyly vaktsınatsııanyń tıimdiligin kórsetedi.
«Vaktsına alýǵa áli batyly jetpegen almatylyqtardy barlyq qorqynysh pen kúmándi joıyp, ekpe saldyrýǵa taǵy da shaqyramyn. Qalanyń árbir turǵyny azamattyq jaýapkershilik pen belsendilik tanytýy tıis», - dedi E. Babaqumarov.