Almatyda 1-11 synyp oqýshylary oqý jyly aıaqtalǵansha qashyqtan oqıdy

ALMATY. QazAqparat - Almaty qalalyq bilim basqarmasy basshysynyń orynbasary Qaırat Jumanov onlaın brıfıng barysynda IV toqsandaǵy oqytý formaty týraly aıtty, dep habarlaıdy QazAqparat tilshisi.

Spıker atap ótkendeı, Almaty qalasy qazirgi ýaqytta «qyzyl» aımaqta jáne epıdemıologııalyq jaǵdaı nasharlap barady.

«Osyǵan baılanysty, koronavırýs ınfektsııa boıynsha epıdemıologııalyq jaǵdaıdyń nasharlaýy jaǵdaıynda mektepterdiń ońtaıly jumys rejımin qamtamasyz etý úshin Almaty qalasy bas memlekettik sanıtar dárigeriniń qaýlysymen 2020-2021 oqý jylynyń sońyna deıin jalpy bilim beretin mektepterdiń 1-synyptan 11-synypqa deıingi oqýshylaryn qashyqtan oqytý formatyna kóshirý sheshimin qabyldady. Sondaı-aq ata-anasynyń ótinishi boıynsha balalar sany 15 adamǵa deıin 1-den 5-synypqa deıingi, 9 jáne 11 (12) synyp oqýshylaryna kezekshi synypta oqýǵa ruqsat berý týraly sheshim shyǵaryldy», - dedi qalalyq bilim basqarmasynyń ókili.

Búgingi tańda qaladaǵy barlyq mektep sanıtarlyq qaýipsizdikti qamtamasyz etetin dezınfektsııalaýshy quraldarmen 100% qamtamasyz etilgen.

Bilim uıymdarynyń birinshi synybyna keletin balalardyń ata-analarynan nemese ózge de zańdy ókilderinen qujattardy qabyldaý 1 sáýir men 1 tamyz aralyǵynda júrgiziledi.

Balalardy birinshi synypqa qabyldaý úshin kelesi qujattar qajet:

1) ata-anasynyń nemese balanyń basqa zańdy ókilderiniń ótinishi

2) balanyń týý týraly kýáliginiń kóshirmesi

3) 3h4 sm ólshemdi balanyń fotosýreti, eki dana

4) densaýlyq jaǵdaıy týraly anyqtama (№ 063 / ý, jáne 026 / ý-3 formalary).

Qalada jalpy kontıngenti 287 myńnan astam oqýshyny quraıtyn 278 mektep bar, onyń 207-si memlekettik, al 71-i - jekemenshik mektep.