Almaty zoobaǵynda zebraǵa evtanazııa jasaldy

ALMATY. QazAqparat – Almaty zoobaǵynda Rıchard atty zebranyń tirshiligi uıyqtatý tásilimen toqtatyldy. Bul týraly zoobaqtyń resmı akkaýntynda jazyldy, dep habarlaıdy QazAqparat tilshisi.

«2018 jyly Rıchardqa qaterli isik dıagnozy qoıylǵan. Veterınarlar kúrdeli ota jasap, onyń ómirin taǵy tórt jylǵa uzartýǵa múmkindik berdi jáne osy tórt jylda Rıchard bir ret qulyndady. Biraq qaterli isik aýrýyn tolyq emdeý múmkin bolmady. Jaqynda Rıchardtyń jaǵdaıy kúrt nasharlady, aǵzasyn jaılaǵan qaterli dert ony emdeýge jol bermedi. Biz aýrýǵa shaldyqqan janýardy qınaǵymyz kelmedi», - dep habarlady Almaty zoobaǵynan.

Halyqaralyq haıýanattar baǵy men akvarıýmdar qaýymdastyǵynyń etıkalyq kodeksine sáıkes, aýrýy qatty asqynǵan, aıyqpas dertke shaldyqqan janýarlardyń tirshiligi medıtsına jolymen toqtatylady. Búgin Rıchardqa evtanazııa jasaldy.

«Rıchard – baqqa kelýshilerimizdiń eń súıikti janýarlarynyń biri edi. Zebra 2000 jyly Slovakııadaǵy Boınıtse haıýanattar baǵynda týǵan. 2001 jyly Almatyǵa ákelingen. Odan taraǵan jeti qulyn búginde dúnıejúzindegi basqa haıýanattar baǵynda júr», - dep atap ótti zoobaqtaǵylar.

Foto: instagram.com/almatyzoo