Almaty zoobaǵynda qaýipti balyq meken etedi

Almaty zoobaǵynyń mamandary sýda júzetin «qabylandardyń» vıdeosyn jarııalady, dep habarlaıdy QazAqparat tilshisi.

«Bul – mýrena qabylan balyǵy. Túr-túsi qabylandykindeı qońyr ala bolǵandyqtan osylaı atalyp etken. Bizdiń zoobaǵymyzda olardyń ekeýi bar. Olar úlken, dóńgelek akvarıýmda júzip júredi. Mýrena jylanbalyq tuqymdasyna jatady. Kóbine tynyq Muhıt pen Úndi muhıtyn mekendeıdi», - dep atap ótti zoobaq ókilderi

Onyń basqa balyqtardykindeı qabyrshyǵy joq. Onyń ornyna silekeılengen jýan, qalyń terisi bolady. Zoobaqtaǵy mýrenalardyń uzyndyǵy bir metrge jetedi. Aýzy úlken, eki jaq súıegi bar. Myqty tisterimen jemtigin shap berip ustap alady. Mýrenamen kezdesken balyqtar odan ońaı qashyp qutyla almaıdy.

«Mýrena óziniń aldyńǵy jaq súıegimen jemtigin tistese, óńeshine jaqyn ornalasqan ekinshi jaq súıegimen jemtikti ishine qaraı ıterip, jutyp alady. Onyń tisteri artqa qaraı maıysyp turady. Kádimgi qaqpan sııaqty túsken jemtigin tyrp etkizbeıdi. Osyndaı jyrtqyshtyǵyna qaramastan mýrena ýly emes. Alaıda ol tistep alsa, orny qatty aýyryp, uzaq jazylady. Sebebi onyń aýyz qýysyndaǵy silekeıinde aýrý týdyratyn mıkrobtar bar. Bul mıkrobtar aýyz qýysynda qalǵan jemtiktiń qaldyqtarynan paıda bolady», - dep sýrettedi zoobaqtaǵylar.

Mamandardyń aıtýynsha, mýrena adamdar úshin qaýipti emes. Biraq ony úrkitip, túrtetin bolsańyz, qaýip tóndirýi múmkin.

«Zoobaǵymyzda mýrenalar balyq, segizaıaq, asshaıan, kalmarlarmen kórektenedi. Olardyń kóbeıýi tolyq zerttelmegen. Ómir súrý uzaqtyǵy – 10 jyl», - dep atap ótti zoobaqtan.