Almaty jurty ásker qataryna shaqyrylǵan sarbazdardy saltanatpen shyǵaryp saldy
Saltanatty sharaǵa qala basshysy Baýyrjan Baıbek qatysyp, jınalǵan qaýymdy merekemen quttyqtady.
«Qurmetti ardagerler, jas sarbazdar sizderdi mańyzdy merekemen quttyqtaımyn. 1992 jyly 7 mamyrda, osydan 25 jyl buryn, Elbasy Jarlyǵymen QR Qarýly Kúshteri quryldy. Osy jyldardyń ishinde bizdiń Qarýly Kúshterimiz zamanaýı tehnıkalarmen jabdyqtaldy. Dástúr boıynsha biz osy kúni jas almatylyqtardy áskerge attandyramyz. Búgin 55 jas sarbaz Otan aldyndaǵy boryshyn óteýge attanyp barady. Olarǵa sáttilik tileımiz», - dedi Baýyrjan Baıbek.
Búgingi merekelik sharany kórýge UOS ardagerleri de shaqyryldy. Qala basshysy ardagerlerge qurmet kórsetý jas urpaqtyń mindeti ekenin aıtty.
«Ókinishtisi, ardagerlerimizdiń qatary sırep barady. Biz olarǵa qaryzdarmyz, Jas kezderińizde, 20 jasqa tolmaı maıdanǵa attanyp qyrshyn ketken, Otanyn qorǵaǵan atalarymyzdy biz eshqashan umytpaımyz», - dedi Baýyrjan Baıbek.
Búgin jas sarbazdardy shyǵaryp salý saltanatty sharasynda Almaty qalasy boıynsha Qorǵanys isteri departamentiniń basshysy general-maıor Nıkolaı Qýatov áskerge attanyp bara jatqan jastar izinen ergen baýyrlaryna úlgi bolady dep senetinin aıtty.
«Qazaqstannyń Qarýly Kúshteri Otan qorǵaýdyń jańa zamanǵa saı ınstıtýtyna aınaldy. Ásker qataryna shaqyrylyp otyrǵan bolashaq sarbazdar bolashaq urpaqqa úlgi bolady dep senemin», - dedi aq jol tilegen Nıkolaı Qýatov.