Almaty joldarynda 1000-nan astam vıdeokamera ornatylady

ALMATY. QazAqparat - Kelesi jyly Almaty joldarynda 1000-nan astam vıdeokamera ornatylady. Bul týraly Almaty qalasynyń ákimi Baýyrjan Baıbektiń, Memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasynyń orynbasary Alık Іshpekbaevtyń, ákimdik, ortalyq memorgandardyń aýmaqtyq departamentteri jáne «Nur Otan» partııasy ókilderiniń qatysýymen sybaılas jemqorlyqqa qarsy is-áreket máseleleri boıynsha ótken májilis barysynda belgili boldy.

Osylaısha, sybaılas jemqorlyqqa jol bermeý, joldarda polıtseılermen baılanysty boldyrmaý aıasynda 2017 jyly qala kósheleri boıynsha myńnan astam vıdeokamera ornatylady.
 A. Іshpekpaev eldegi sybaılas jemqorlyq quqyq buzýshylyq statıstıkasyn jarııalap, sybaılas jemqorlyqqa qarsy júrgizilgen saıasattyń arqasynda Qazaqstan osy baǵytta kórsetkishti jaqsartyp jatqanyn atap ótti. «Jemqorlyq taqyryby memleketti ǵana emes, qoǵamdy da alańdatýda. Bul kúlli eldiń problemasy.

Álemde 123-shi oryndamyz. Bul jemqorlyq deńgeıi elde joǵary degendi bildiredi. Sybaılas jemqorlyqqa qarsy saıasattyń arqasynda 2014-2016 jyldary 17 satyǵa kóterildik», - dedi ol. "Sońǵy 1 jyl 9 aıda 660 laýazymdy tulǵaǵa aıyppul salyndy. Osylaısha, ótken jyly bıýdjetke 3,5 mlrd. teńge kelip tústi. Agenttik tóraǵasynyń orynbasary atap ótkendeı, kórsetilgen merzimde aıyppul tólemeıtin qyzmetshiler bas bostandyǵynan aıyrý túrinde jazaǵa tartylady. Osy kezeńde 924 memlekettik qyzmetshiniń múlki tárkilendi, 1210 - ómir boıy memlekettik qyzmette jumys isteý quqyǵynan aıyryldy".