Almaty joldary jańa tehnologııamen salynady – Erbolat Dosaev

ASTANA. QazAqparat – Úlken Almaty aınalma joly megapolıstiń jol júktemesin 20%-ke azaıtady. Bul týraly qala ákimi Erbolat Dosaev elordada ortalyq kommýnıkatsııalar qyzmetinde aıtty, dep habarlaıdy QazAqparat tilshisi.

«Qabyldanǵan jańa bas jospardy eskere otyryp, qalanyń kólik karkasyn qalyptastyrý jumystary belsendi júrýde. Úlken Almaty aınalma jolyna alty radıaldy joldy uzartý jumysy júrip jatyr. Búgingi tańda Móńke bı kóshesi boıynsha qozǵalys ashyq, Saın jáne Rysqulov dańǵyldary uzartylady. Abaı dańǵyly, Soltústik aınalym jáne Tilendıev kósheleri boıynsha jobalyq-smetalyq qujattama ázirlenýde», - dedi Erbolat Dosaev.

Onyń aıtýynsha, Úlken Almaty aınalma avtojolyn ashý megapolıstiń jol júktemesin orta eseppen 20%-ke azaıtady.

Bul Memleket basshysynyń úlken júk tasýshy kólikterdi qalaǵa kirgizbeý tapsyrmasyn oryndaýdy qamtamasyz etedi.

«Áıtse de, jol ınfraqurylymynyń negizgi problemalary – jol tóseminiń sapasy jáne jol lıýkteriniń ornynan qozǵalýy sekildi aqaýlar bolyp otyr. Bul joldardy jańartýda jańa tásilderdi qajet etedi. 2022 jyly pılottyq rejımde joldardyń sapasyn jaqsartý úshin asfalt-beton qospasyna polımerli qospalar syndy jańa materıaldardy qoldandyq. Olar aýyrtpalyqqa jáne klımattyq jaǵdaılarǵa tózimdi. Bıyl 6 shaǵynaýdanda 25 shaqyrym jańa jol salýdy jáne 200 shaqyrym ortasha jóndeý júrgizýdi josparlap otyrmyz. Onda 15 magıstraldyq joldarda polımerli qospalardy paıdalanýdy josparlap otyrmyz. Osy jumystar sheńberinde mehanıkalyq jáne temperatýralyq júktemelerge tótep beretin 8 myń «jyljymaly» lıýkter ornatylady», - dep túsindirdi E. Dosaev.

Qala ákimi jańa tehnologııalardy qoldaný ortasha jóndeý júrgizý merzimin 5 jyldan 10 jylǵa deıin uzartatynyn basa aıtty.