Almaty joldary úsh jylda 95% jaqsarady

ALMATY. QazAqparat - 2025 jylǵa qaraı megapolıstegi joldardyń 95 paıyzy jaqsy jáne qanaǵattanarlyq jaǵdaıǵa jetedi. Bul týraly brıfıng barysynda Almaty qalalyq mobıldilik basqarmasy basshysynyń orynbasary Ernur Abjahan málim etti, dep habarlaıdy QazAqparat tilshisi.

Spıkerdiń sózinshe, Almaty qalasynyń kóshe-jol jelisiniń uzyndyǵy – 3096 shaqyrym, onyń 234 shaqyrymy asfalttalmaǵan.

«Biz 2025 jylǵa qaraı qaladaǵy jaqsy joldardyń úlesin 95% jetkizýdi josparlap otyrmyz. Ol úshin 234 km jańa jol salamyz, jyl saıyn keminde 200 km jolǵa ortasha jóndeý júrgiziledi», - deıdi Ernur Abjahan.

Sonymen qatar ol úsh jolaıryqtyń qurylysy týraly aıtty.

«Buqtyrma – Qulja traktisi kósheleriniń qıylysyndaǵy jumystar bekitilgen kestege sáıkes júrgizilip jatyr. Jer ýchaskelerin satyp alý aıaqtaldy. Qarajat tolyq kólemde bólindi. 1 qyrkúıekke deıin estakada men pandýstardy salý boıynsha qurylys-montaj jumystaryn aıaqtap, sol arqyly barlyq baǵyttar boıynsha kólikterdiń júrýin qamtamasyz etý kózdelgen. Abattandyrýdy eskere otyryp, tolyq aıaqtaý 2022 jyldyń sońyna deıin josparlanyp otyr», - dedi basqarma ókili.

Seıfýllın dańǵyly men Jansúgirov kóshesiniń qıylysyndaǵy jumystar da satyp alynǵan ýchaskelerde júrgizilip jatyr. Jumystar 2023 jyly tolyq aıaqtalady.

«Saın – Móńke bı kóshelerindegi jol aıryǵynyń qurylysy boıynsha daıyndyq jumystary bastaldy. Jobalaý-smetalyq qujattar jasalýda. Bıyl kommýnıkatsııalardy jóndeý jáne aınalma joldardy salý boıynsha jumystar bastalady, olar kelesi jyldyń sońyna qaraı aıaqtalatyny kózdelgenn»,- dep atap ótti spıker.