Almaty JEO-lary aýaǵa úlken kólemde shyǵaryndy tastaıdy –EQDB ókili

ASTANA. QazAqparat – Eýropa qaıta qurý jáne damý bankiniń (EQDB) Eýrazııa, Taıaý shyǵys jáne Afrıkadaǵy energetıka jónindegi dırektory Aıda Sıtdıkova Astana halyqaralyq forýmynyń paneldik otyrysynda Ortalyq Azııa elderine qazba otyndy sýbsıdııalaýdan bas tartýǵa úndedi, dep habarlaıdy QazAqparat tilshisi.

«Bul jerde saıası erik-jiger men keleshek týraly ashyq túsinik kerek. Qazaqstan aqpan aıynda óziniń uzaq merzimdi josparyn (kómirteginen beıtaraptyq týraly – red.) maquldady. Sondaı-aq Qazaqstan osy óńirdegi kómirtegi shyǵaryndylaryn 2060 jylǵa qaraı nólge jetkizý, ınklıýzıvti energııa júıesin qamtamasyz etý jónindegi maqsatyn jarııalaǵan alǵashqy el», - dedi EQDB ókili.

Sondaı-aq ol Qazaqstanda óndiriletin energııanyń 60 paıyzdan astamy kómirden alynatynyn eske saldy.

«Mysaly, Almatydaǵy jylý-elektr ortalyqtary qorshaǵan ortaǵa úlken kólemde shyǵaryndy tastaıdy. Bul azamattardyń densaýlyǵyna áser etedi. Mundaı jaǵdaıda gazdy paıdalaný usynylady. Buǵan neǵurlym erte qol jetkizsek, kómirtegi beıtaraptyǵyn soǵurlym erte qamtamasyz etemiz.

Qazba otyndy sýbsıdııalaýdyń klımattyń ózgerýi, halyqtyń densaýlyǵy, ekonomıkalyq áseri degen sııaqty saldary da bar.

Memleketterge óz eksportyn kómirteksizdendirý máselesimen aınalysyp, básekege qabilettiligin ornyqty qamtamasyz etý kerek. Onyń bári aqshaǵa kelip tireledi. Biz bul jerde basqa balama jol kórip turǵan joqpyz», - dedi Aıda Sıtdıkova.