Almaty jedel járdem stantsııasy dırektorynyń orynbasary vaktsınadan keıingi jaǵdaıy týraly aıtty

ALMATY. QazAqparat - Alǵashqylardyń biri bolyp «Spýtnık V» vaktsınasyn saldyrǵan Almaty jedel medıtsınalyq járdem stantsııasy dırektorynyń orynbasary Aleksandr Lazarev qazirgi jaǵdaıy týraly aıtty, dep habarlaıdy QazAqparat tilshisi.

«Men Reseıdiń «Spýtnık V» vaktsınasyn saldyrdym. Endi ekinshi dozany 21 kúnen keıin alamyn. Jaǵdaıym jaqsy. Eshqandaı keri reaktsııa baıqalmady. Ózimdi jaqsy sezinemin. Antıdeneler 15 kúnde paıda bolýy kerek. Muny vaktsınanyń ekinshi dozasynan keıin qan analızi arqyly anyqtaýǵa bolady», - dedi Aleksandr Lazarev.

Sonymen qatar ol adamdarǵa vaktsına alýdyń qajettiligin túsindirdi.

«Koronavırýs ınfektsııasy óte qaýipti. Sondyqtan vaktsına alý kerek dep oılaımyn. Eger siz KVI-ge qarsy vaktsına saldyrmasańyz, ony juqtyryp alýyńyz ábden múmkin. Sodan keıin, ókpeńiz zaqymdanady. Al pnevmonııa adamdar úshin óte qıyn aýrý», - dedi ol.

Onyń aıtýynsha, adamdar óz densaýlyǵyna nemquraılyq tanytpaýy kerek. Barynsha saqtanyp, sanıtarlyq talaptardy oryndaýǵa mindetti.

Eske salaıyq, 2021 jyldyń aqpan aıynan bastap elde COVID-19 vaktsınatsııasy bastaldy. Birinshi komponentti vaktsınalaýmen medıtsına qyzmetkerleri qamtyldy.