«Almaty jastaryna» qatysý úshin qalada turaqty tirkelý mindetti emes

ALMATY. QazAqparat- Almaty qalalyq turǵyn úı saıasaty basqarmasy basshysynyń orynbasary Ermek Ámirov brıfıng barysynda «Almaty jastary» baǵdarlamasyna qatysýshylarǵa qoıylatyn negizgi talaptardy aıtyp berdi, dep habarlaıdy QazAqparat tilshisi.

Onyń aıtýynsha, «Almaty jastaryna» qatysý úshin turaqty tirkeý mindetti emes. Eń bastysy - megapolıste jumys istese bolǵany.

Sonymen qatar, baǵdarlamaǵa qatysýshynyń jasy 35-ke deıin bolýy kerek.

Ekinshiden úmitkerde jáne onyń otbasy músheleriniń menshiginde turǵyn úı, sondaı-aq Qazaqstan aýmaǵynda sońǵy 5 jyl ishinde turǵyn úı jaǵdaıynyń ádeıi nasharlaý faktileri bolmaýy tıis.

«Sondaı-aq qatysýshynyń Almaty qalasyndaǵy densaýlyq saqtaý, bilim, mádenıet, sport, JOO men ǴZI, jýrnalıster, áleýmettik sala jáne quqyq qorǵaý organdary sanattary boıynsha mindetti zeınetaqy aýdarymy bar, kem degende sońǵy 6 aı ishinde resmı jumys ótili bolýy kerek. Almaty qalasynda tirkelgen, bir jyldan kem emes merzimde áreket etetin jeke kásip ıesi de qatysa alady, alaıda atalǵan talap mádenıet salasyndaǵy ózin-ózi jumyspen qamtyǵan qatysýshylarǵa ǵana qatysty»,- dedi ol.

«Otbasy bank» AQ Almaty qalasy fılıalynyń dırektory Danagúl Túsipovanyń aıtýynsha, iriktelgen úmitkerlerge saıttaǵy jeke kabınette tólem qabiletin rastaý úshin joldama beriledi.

Joldama alǵan ótinish berýshilerge 15 jumys kúni ishinde tólem qabiletin baǵalaýdan ótý úshin «Otbasy bank» AQ kez kelgen qyzmet kórsetý ortalyǵyna júginý qajet.

«Tólem qabiletin sátti rastaǵan qatysýshylar 45 kúntizbelik kún ishinde bastapqy jáne qaıtalama naryqta turǵyn úıdi derbes tańdaıdy. Tańdalǵan turǵyn úıdiń qujattary turǵyn úı qaryzyn berý múmkindigin qaraý úshin «Otbasy bankke» usynylady. Bank maquldaýyn alǵannan keıin satyp alý-satý shartyn jáne kepil shartyn rásimdeý jáne tirkeýdi júzege asyrady»,-dedi Danagúl Túsipova.