«Almaty jastary» turǵyn úı baǵdarlamasynyń sharttary qandaı

ALMATY. QazAqparat - «Almaty» telearnasyndaǵy Akimat Live baǵdarlamasynyń tikeleı efırinde megapolıs ákimi Baqytjan Saǵyntaev jumys isteıtin jastarǵa jalǵa beriletin baspana baǵdarlamasy týraly aıtty, dep habarlaıdy QazAqparat tilshisi.

Baqytjan Saǵyntaev tikeleı efır barysynda 15 qarashada 29 jasqa deıingi jumys isteıtin jastar úshin jalǵa beriletin turǵyn úı baǵdarlamasyna ótinim qabyldaý bastalatynyn málim etti.

Ótinimdi 2021 jyldyń 20 qarashasynda saǵat 23.59-ǵa deıin berýge bolady.

Ótinim qabyldaý www.almaty-jastary.info.saıtynda júrgiziledi, saıtqa ótinish berýshilerdiń elektrondyq-tsıfrlyq kiltimen kirýge bolady.

Baǵdarlamaǵa qatysýshylarǵa qoıylatyn negizgi talaptar: jasy – 29 jasqa deıin, Almatyda sońǵy eki jyldan kem emes turaqty tirkelýi, sońǵy eki jyl ishinde Qazaqstan aýmaǵynda turǵyn úıiniń bolmaýy.

Budan basqa, sońǵy 6 aıda úmitkerlerdiń aı saıynǵy jalaqysy 40 AEK-ten joǵary bolýy tıis – 116 680 teńge.

«Beriletin páterler Naýryzbaı aýdanyndaǵy «Alma Sıtı-5» jańa turǵyn úı kesheninde jáne Alataý aýdanyndaǵy «Mádenıet» turǵyn úı kesheninde ornalasqan. Jalpy sany – 1 050 bir bólmeli páter. Jalǵa berý merzimi – uzartý quqyǵynsyz 5 jyl. Budan basqa, qalada jastarǵa «Almaty jastary 3.0» jeńildetilgen nesıe berý baǵdarlamasy jumys isteıdi. Baǵdarlama bıýdjeti – 18 mlrd teńge. Qaryzdyń eń joǵarǵy somasy – 18 mln teńgege deıin, paıyzdyq mólsherleme – 5%, bastapqy jarna – 10%»,- dep túsindirdi qala ákimi.

Atalǵan baǵdarlama boıynsha jyl saıyn 1000 jas bastapqy jáne qaıtalama turǵyn úı satyp alý múmkindigine ıe bolady.

Búgingi tańda «Almaty Jastary 3.0» baǵdarlamasy boıynsha 14,7 mlrd teńge somasyna 868 zaem berildi.

Baǵdarlama bilim, densaýlyq saqtaý, mádenıet jáne sport, BAQ, áleýmettik salalarda jumys isteıtin jastarǵa arnalǵan.

Sondaı-aq, ony joǵary oqý oryndary men ǴZI, quqyq qorǵaý organdarynyń qyzmetkerleri paıdalana alady.