Almaty jastary táýelsizdiktiń mańyzyn talqylady

ALMATY. QazAqparat - Almatyda «Qazaqstan Team» Respýblıkalyq qoǵamdyq jastar uıymynyń belsendileri men qala jastary «Táýelsizdik bárinen qymbat» taqyrybynda paneldik talqylaý ótkizdi, dep habarlaıdy QazAqparat tilshisi.

Táýelsizdiktiń 30 jyldyǵyna oraı ótip jatqan sharada «Qazaqstan Team» Respýblıkalyq qoǵamdyq jastar uıymynyń jetekshisi Oljas Súleımenov jıynnyń maqsatyn túsindirdi.
«Búgingi jıynda ár salada júrgen bilimdi, bilikti, kóshbasshy jastardyń «táýelsizdik» uǵymyn qalaı túsinetini, ony qalaı qadirlep, baǵalaıtyny, elimizdiń bolashaǵyn baıandy etý jolynda jastardyń qandaı bolýy qajettigin talqylaý úshin jastarmen motıvatsııalyq kezdesý ótkizýge arnalyp otyr», - dedi.

Kezdesýge shaqyrylǵan qonaqtar - Almaty qalasy máslıhatynyń depýtaty, Qurylys salasy odaǵynyń basqarma tóraǵasy, «ShEBER» kompanııalar tobynyń negizin qalaýshy, kásipker Eraly Saýranbaev, Ulttyq qoǵamdyq senim keńesiniń múshesi jáne bilim berý máseleleri jónindegi sarapshy Qaısar Tursynqoja, «Asar Ume» negizin qalaýshy, «Qazaqstannyń laıyqty azamaty» jobasynyń jeńimpazy Ashat Nurmashev, akter, «Sheker» telehıkaıasynyń basty róldi somdaýshy Azat Jumadil táýelsizdik jaıly óz oılarymen bólisti.

Almaty qalasy máslıhatynyń depýtaty Eraly Saýranbaevtyń aıtýynsha, táýelsizdik - elimizdiń eń basty qundylyǵy. «Jastarǵa otansúıgish, patrıot bolǵany jón. Elimizdiń táýelsizdikte jetken jetistikterimen shektelmeı, ony ary qaraı da molaıtý jastardyń qolynda. Elimiz jaqsy damysyn desek, biz aldymen ózimizdi damytýymyz kerek. Ózimiz jaqsy jaqqa ózgerýimiz kerek»,- dedi ol. Ulttyq qoǵamdyq senim keńesiniń múshesi jáne bilim berý máseleleri jónindegi sarapshy Qaısar Tursynqoja el erteńi jastardyń isker, óz oıyn erkin, ashyq aıtatyn, qoǵamnyń damýyna oı qosatyn, bir-birine qoldaý kórsetetin, qajet bolsa da bıliktegi laýazymdy tulǵalarǵa da oı sala alatyndaı bilimdi bolǵany durys. «Qazaqstannyń laıyqty azamaty» jobasynyń jeńimpazy Ashat Nurmashev bizdiń ata-babalardyń el táýelsizdigine óte qushtar bolǵan. «Dál osy táýelsiz, erkin bolý sezimi qul bolǵan Beıbarysty Mysyr sultany dárejesine deıin jetkizdi. Bizge búgingi kúni bas bostandyq, erkindigimizdi qorǵaýǵa bir-birimzge kómekteskenimiz durys. Bir-birimizdiń pikirimzdi syılaǵanymyz durys. Eshkimniń ar-namysyna tımegen durys»,-dedi ol. Jas akter Azat Jumadil ózimen quralpas búgingi jas býyn ókilderi týraly oıyn ortaǵa saldy. «Bizdiń qazirgi jas býyn ókilderi erkin oıly, óz oıyn ashyq aıta alady. Biraq, qazirgi jastarǵa aıtar keńesim bar edi. Ol – ózi tańdaǵan salany sońyna deıin qýalap, sonyń shyńyna shyǵyp, jetistikke jetip jatsa, eldiń damýy da durys bolady dep oılaımyn. Qazirgi jastar erinshek bolmasa eken degen tilegim bar»,- dedi Azat.

Shara sońynda jıynǵa qatysqan jastar qonaqtarǵa saýldaryn qoıyp, qajetti jaýaptaryn aldy.