«Almaty jastary» baǵdarlamasyn júzege asyrýǵa 20 mlrd teńge bólindi

ALMATY. QazAqparat - Bıyl «Almaty jastary» turǵyn úı baǵdarlamasyn júzege asyrýǵa jergilikti bıýdjetten 17 mlrd teńge qarastyryldy, bul ótken jylmen salystyrǵanda 2 mlrd teńgege artyq. Sondaı-aq, «Otbasy banki» qosymsha 3 mlrd teńge bóledi.Bul týraly Almaty qalasynyń Óńirlik kommýnıkatsııalar qyzmetinde ótken baspasóz máslıhaty barysynda «Otbasy bank» AQ Almaty qalalyq fılıaly dırektorynyń orynbasary Elızada Túretaeva málim etti, dep habarlaıdy QazAqparat tilshisi.

Aıtýynsha, turǵyn úı baǵdarlamasymen keminde 1100 adamdy qamtý josparda. Ótinimderdi qabyldaý 15 mamyrdan bastalady.
Turǵyn úı baǵdarlamasynyń áleýetti qatysýshylary almaty-zhastary.kz saıtynda onlaın ótinish bere alady. Ol úshin úmitkerlerge ETsQ qajet.
Almaty ákimdigi men Otbasy bankiniń birlesken jobasyna 35 jasqa deıingi/tolǵan almatylyqtar qatysa alady. Ótinishter Almaty qalasyndaǵy memlekettik respýblıkalyq jáne qalalyq uıymdarda jumys isteıtin azamattardyń kelesi sanattarynan qabyldanady:
- dárigerler men medbıkeler;
- muǵalimder men tárbıeshiler;
- ártister, jazýshylar, sýretshiler, kompozıtorlar, mádenıet salasynyń qyzmetkerleri;
- jattyqtyrýshylar men sportshylar;
- ýnıversıtetter men ǵylymı-zertteý ınstıtýttarynyń oqytýshylary men ǵylymı qyzmetkerleri;
- áleýmettik sala qyzmetkerleri men qalalyq kommýnaldyq qyzmet mamandary;
- quqyq qorǵaý organdarynyń qyzmetkerleri (QR ІІM, TJD, qalalyq prokýratýra, Sybaılas jemqorlyqqa qarsy qyzmet, Ekonomıkalyq tergeý departamenti);
- jýrnalıster men BAQ qyzmetkerleri (memlekettik jáne kommertsııalyq);
Úmitkerlerdiń resmı jumys ótili Almaty qalasynda sońǵy jarty jyldan kem bolmaýy kerek.
Sondaı-aq, baǵdarlama qatysýshysy jáne onyń otbasy músheleri sońǵy 5 jyl ishinde jyljymaıtyn múlikke ıe bolmaýy tıis.
«Almaty jastary» baǵdarlamasy 2017 jyly bastalǵan bolatyn. Qazirgi tańda qalanyń jas turǵyndary arasynda óte tanymal. Osy ýaqyt aralyǵynda biz qala basshylyǵymen birlesip 3 393 jas azamatty 52,5 mlrd teńgege baspanamen qamtamasyz ettik. Bıyl baǵdarlamany júzege asyrýǵa 20 mlrd teńge bólindi, onyń 17 mlrd teńgesi qalalyq bıýdjetten, 3 mlrd teńgesi Otbasy bankinen. Bul qarajat 1100 almatylyq turǵynnyń baspana máselesin sheshýge múmkindik beredi», - dep túsindirdi «Otbasy Banki» AQ Almaty qalalyq fılıaly dırektorynyń orynbasary Elızada Túretaeva.
Almaty-zhastary.kz saıtynda ótinishterdi qabyldaý aıaqtalǵannan keıin Almaty qalasy turǵyn úı saıasaty basqarmasy úmitkerlerdiń jınalǵan upaılary boıynsha qatysýshylardy irikteıdi. Upaı sanyna nekege turǵan jyldary, balalarynyń bolýy, kásibi boıynsha úzdiksiz eńbek ótiliniń uzaqtyǵy, halyqtyń áleýmettik osal toptaryna jatýy áser etetin bolady.
Úmitker tizimi qurylǵannan keıin olardyń barlyǵy tólem qabilettiligin rastaý úshin Otbasy bankine joldama alady. Bank qatysýshyǵa zaem alý týraly oń sheshim shyqqan kúnnen bastap baspana izdeýge 45 kúntizbelik kún ýaqyt beredi. Páterdi Almaty qalasyndaǵy alǵashqy nemese ekinshi naryqtardan, sondaı-aq «Qazaqstan turǵyn úı kompanııasy» AQ kepildigi bar nysandardan satyp alýǵa bolady.
Otbasy bank turǵyn úıin satyp alýǵa 18 mln teńgege deıin zaem bere alady (eger múliktiń quny 18 mln teńgeden joǵary bolsa, onda aıyrmashylyqty qatysýshy óz qarajaty esebinen tóleı alady). Alǵashqy jarna keminde 10% bolýy kerek. Nesıe boıynsha syıaqy mólsherlemesi 5% (JTSM 5,2%) bolady. Nesıeni 25 jylǵa deıin alýǵa bolady.
Eske salsaq, Almaty qalasynyń ákimi Erbolat Dosaevtyń tapsyrmasy boıynsha jas muǵalimder men dárigerler úshin baǵdarlama aıasynda qosymsha qarjy bólindi jáne lımıt 100 zaımǵa ulǵaıtyldy: muǵalimder úshin – 50, dárigerler úshin – 50.
Aıta keteıik, «Almaty jastary» baǵdarlamasyna qatysý úshin qalada turaqty tirkelý mindetti emes.