«Almaty jastary» arqyly páter alǵysy kelgen 3,8 myń adamnyń ótinishi qabyldanbady

ALMATY. QazAqparat – Bıyl «Almaty jastary» qalalyq baǵdarlamasy boıynsha baspana satyp alýǵa 9 741 adam ótinish bildirdi, onyń 5 913-i qanaǵattandyrylyp, 3 828 ótinish baǵdarlama talaptaryna sáıkes kelmegendikten qaıtaryldy.

Bul týraly onlaın brıfıng barysynda Almaty qalasy turǵyn úı saıasaty basqarmasynyń orynbasary Ermek Ámirov aıtty, dep habarlaıdy QazAqparat tilshisi.

«Baǵdarlamanyń talaptaryna sáıkes kelmeýine baılanysty 3828 ótinish (39%) qabyldanbady. Máselen, turǵyn úıdiń bolýy jáne sońǵy bes jyl ishinde turǵyn úıdi ıelikten shyǵarý faktileri, zeınetaqy jarnalarynyń bolmaýy, qujattardyń usynylmaýy, sáıkes kelmeýi tańdalǵan salamen (sanatpen) jumys orny. Mysaly, eger azamat bilim berý qyzmetkeri retinde ótinish bildirse, biraq bilim berý qyzmetkeri bolmasa, onda onyń ótinshi qanaǵattandyrylmaıdy», - dep jaýap berdi Ermek Ámirov.

Sonymen qatar, ol bıylǵy jyly irikteýden ótpeı qalǵandar kelesi jyly nemese basqa da qoldanystaǵy baǵdarlamalarǵa qatysa alatynyn aıtty.

«Іriktelgen azamattarǵa saıttaǵy jeke kabınetterine Otbasy bankte tólem qabilettiligin rastaý úshin lımıtter sheńberinde joldamalar beriledi. Osy joldama 15 jumys kún ishinde jaramdy. Tólem qabilettiligin rastaǵan qatysýshylar 45 jumys kúni ishinde bastapqy jáne qaıtalama naryqta óz betimen turǵyn úıdi tańdaıdy»,-dedi ol.

Eske salaıyq, «Almaty jastary 3.0» turǵyn úı baǵdarlamasy tómen paıyzdyq mólsherlememen 2020 jyly bastalǵan bolatyn. Oǵan 35 jasqa deıingi almatylyqtar qatysa alady.