Almaty ustazdary «Digital Ustaz Almaty» konkýrsy aıasynda bilim alýda

ALMATY. QazAqparat - Almatyda «Digital Ustaz Almaty» pedagogter arasyndaǵy qalalyq konkýrstyń Baıqaý keńesiniń birinshi otyrysy ótti, dep habarlaıdy QazAqparat tilshisi.

Otyrys barysynda qala ákimi Baqytjan Saǵyntaev pandemııa kezinde bilim berýdiń jańa standarttarǵa kóshýdiń mańyzdylyǵyn aıtty.

«Álemniń kóptegen elderinde, sonyń ishinde Qazaqstanda tsıfrlyq bilim berý salasynda pedagogterdiń tek 50%-y bazalyq kompıýterlik saýattylyqty paıdalanady. Al muǵalimderdiń tek 13%-y tsıfrlyq quzyretke ıe. Sondyqtan, oqý protsesin zamanaýı, qoljetimdi, eń bastysy balalarǵa túsinikti etý úshin respýblıkanyń barlyq mektepterinde bilim berýdi transformatsııalaýǵa jol salatyn alǵashqy «Digital Ustaz Almaty» qalalyq konkýrsy uıymdastyrylǵan»,- dedi ákim.

Aıta keteıik, búgingi tańda tirkelgen bir jarym myńnan astam mektep pedagogtary «Digital Ustaz Almaty» birinshi qalalyq konkýrsynyń aıasynda halyqaralyq sarapshylardan bilim alýda. «Digital Ustaz Almaty» sheńberinde pedagogtar SMM jáne blogıng, tsıfrlyq qaýipsizdik negizderin, ınfografıkany qurýdy úırenedi.

Joba Qazaqstan Respýblıkasy Táýelsizdiginiń 30 jyldyǵyna oraılastyrylǵan jáne Qazaqstan Respýblıkasy Bilim jáne ǵylym mınıstrliginiń qoldaýymen, Almaty qalasy ákimdiginiń, «Nursultan Nazarbaevtyń Bilim berý qory» QQ, «EdCrunchAcademy» zamanaýı bilim berý ınstıtýtynyń uıymdastyrýymen ótkizilgen. Bas seriktes «Almaty kitap baspasy» boldy.

Baıqaý keńesiniń quramyna Almaty qalasy ákimdiginiń, QR Bilim jáne ǵylym mınıstrliginiń ókilderi, QR Parlamenti Májilisiniń, Almaty qalasy máslıhatynyń depýtattary, sondaı-aq eńbek sińirgen pedagogtar men bilim berý mekemeleriniń ókilderi kirdi.