Almaty TJD eski elektrsymdaryn aýystyrý qajettigin eskertti
Departamenttiń málimetinshe, bıylǵy on aıda 480 órt tirkelgen. Oqıǵalar sany aldyńǵy jylǵymen salystyrǵanda 18% azaıǵan. Tilsiz jaýdan 558 adam qaýipsiz jerge kóshirilip, 34 adam qutqaryldy. 30-ǵa jýyq adam ıis tıip ýlanǵan.
Oqys oqıǵalar peshtiń jarylýynan, qazandyqtyń bitelip qalýynan bolǵan. Onyń 58% jekemenshik sektorda tirkelgen.
Sonymen qatar, qalany gazdandyrý baǵdarlamasy aıasynda kómirmen jylıtyn úılerdiń sany 2,2 ese azaıǵan. ıAǵnı, 2018-2019 jylytý maýsymynda - 16 626 úı, 2019-2020 jylytý maýsymynda barlyǵy 7264 úı peshpen jylytylady. Kógildir otyn tutynýshylarynyń sany kóbeıýine baılanysty odan ýlaný derekteri de artqan. Bıyldyń ózinde 36 adam ýlanǵan. Byltyr 44 adamǵa medıtsınalyq kómek kórsetilgen bolatyn.
Oqıǵalar kóbinese gaz quralynyń germetıkalyq qorǵanysynyń buzylýynan onyń aýaǵa taraýynan bolǵan. 9 qarashada Naýryzbaı aýdanynyń Qaraǵaıly eldi mekeninde gaz qazandyǵynyń aqaýynan 4 adam ýlanǵan. Bul úıde gaz qubyrynda tartylys júıesi jumys istemegen. Olar toksıkologııa bólimshesine jetkizildi. Onyń ishinde 1 bala bar.
Osy derekterdi nazarǵa ala otyryp, qalalyq TJD 2019-2020 jyldardaǵy jylytý maýsymynda adam ólimi men jaraqattanýdyń aldyn alý josparyn belgiledi. Jekemenshik sektordaǵy 145 úı esepke alyndy. 184 kezdesý uıymdastyrylyp, 85 myń jadynama taratyldy.
Ákimdik qyzmetkerlerimen birige otyryp, áleýmettik turǵydan az qamtylǵan 593 otbasynyń úıi tekserildi. Olardyń ishinde 404 otbasy kómir jaǵyp otyr. Barlyǵyna ıisti gazdy anyqtaıtyn qurylǵy tegin ornatyldy. Jyl basynan beri TJD 1034 datchık ornatqan.
Budan bólek, mamandar elektr energııasymen úıin jylytyp otyrǵan turǵyndarǵa eski elektr symdaryn aýystyrýǵa keńes beredi. Sebebi, tozyǵy jetken allıýmınıı symdar da elektr togynyń kerneýine shydas bermeı, janýy múmkin.
Aıta ketý kerek, 11 qarasha kúni Almatyda Pervomaıka aýylyndaǵy Postyshev, 64 «V» mekenjaıynda úsh qabatty jekemenshik úıde gaz ben aýa qospasynyń jarylysy boldy. Onda jaldamaly bólmelerde 12 otbasy turyp jatqan.
Jarylystan denesin 100 paıyz kúıik (3-dárejeli) shalǵan 36 jastaǵy er adam kóz jumdy.
«19 jastaǵy qyzdyń denesiniń 85 paıyzyn kúıik (3-dárejeli) shalǵan. Jaǵdaıy óte aýyr. 23 jastaǵy jigittiń beti, aıaq-qoldary kúıgen (1-dárejeli). Denesiniń 22 paıyzy zaqymdanǵan. Bul patsıenttiń de jaǵdaıy óte aýyr», - degen bolatyn basqarmanyń baspasóz qyzmetinen.