Almaty turǵynynan 24 keli marıhýana tabyldy

ALMATY. QazAqparat - Almaty turǵyny úıiniń aýlasynda marıhýana ósirgen, dep habarlaıdy QazAqparat tilshisi.

Almaty qalalyq Polıtsııa departamentiniń málimetinshe, «Qarasora» respýblıkalyq is-sharasy aıasynda Medeý aýdanyndaǵy úılerdiń birinde 57 jastaǵy azamat ustaldy.

«Ruqsat etilgen tintý kezinde kúdiktiniń úıinen jalpy salmaǵy 24 keliden astam marıhýana esirtkisi tabylyp, tárkilendi. Sondaı-aq úıdiń irgesindegi aýmaqtan ózi ósirgen 6 túp qarasora tabyldy», – deıdi Ekstremızmge qarsy kúres basqarmasynyń bastyǵy Máýlen Qasymjan.

Atalǵan derek boıynsha QR Qylmystyq kodeksiniń 297-baby 1-bóligine sáıkes sotqa deıingi tergeý amaldary bastaldy.

QR QK-niń 300-baby 1-bóligi (Quramynda esirtki zattary bar ósimdikterdi zańsyz ósirý) sáıkes qosymsha qylmystyq is qozǵaý týraly másele sheshilip jatyr.

Aıta keteıik, búgin polıtseıler Pavlodarda zeınetkerden 33 keli marıhýana men 3,3 keli gashısh tapqan bolatyn.

Qazaqstanda jyl basynan esirtki saýdasyna qatysty 4,2 myń qylmys tirkeldi.

Foto: polisia.kz