Almaty turǵyndary «Nıkolskıı» bazarynyń qazirgi jaǵdaıyna alańdap otyr

ALMATY. QazAqparat – Almatylyqtar «Nıkolskıı» bazarynyń ornyna basqa ǵımarat salynar bolsa, quzyrly mekemeler jaýap berip, qoǵamdyq tyńdaýdy ótkizýdi talap etti. Bul týraly qala belsendileri áleýmettik jelide jazdy, dep habarlaıdy QazAqparat tilshisi.

«Nıkolskıı» bazarymen ne boldy? Bazardyń ornynda ne bolady? Eger bireý birdeńe salǵysy kelse, jaýap pen qoǵamdyq tyńdaýdyń ótýin talap etemiz», - dep jazdy turǵyndar. Sondaı-aq, jelige bazardyń qazirgi fotolaryn saldy.

Atalǵan másele boıynsha QazAqparat tilshisi Almaty qalalyq josparlaý jáne ýrbanıstıka basqarmasyna saýal joldaǵan edi.

Vedomstvonyń jaýabyna sáıkes, Qarasaı batyr kóshesiniń ońtústik jáne Baıtursynov kóshesiniń shyǵys jaǵynda ornalasqan jer ýchaskesi jeke menshikte. Basqarmanyń elektrondyq bazasynyń derekteri boıynsha atalǵan ýchaskede qandaı da bir obektini jobalaýǵa arnalǵan qujattar menshik ıesine berilmegen.

«QR sáýlet, qala qurylysy jáne qurylys qyzmeti týraly Zańynyń» 13-baby jáne «Almaty qalasynyń sáýlettik kelbetin qalyptastyrý jáne qala qurylysyn josparlaý qaǵıdalarynyń» 2-taraýynyń 4-tarmaǵyna sáıkes, jobalaý aldyndaǵy qujattamany alý aldynda qurylys salýshy turǵyndarmen qoǵamdyq talqylaý ótkizýi tıis ekenin atap ótemiz», - delinedi qalalyq josparlaý jáne ýrbanıstıka basqarmasynyń jaýabynda.

Eske salaıyq, buǵan deıin Almatyda 28 bazar zaman talabyna saı jańarǵany týraly jazǵanbyz.

Sondaı-aq, qala shetinde alty saıabaqtyń salynatynyn jáne Tóle bı kóshesin uzartý jumystary bastalǵanyn habarlaǵan bolatynbyz.