Almaty turǵyndary Eýropadan poshta arqyly esirtki aldyryp, satyp kelgen - UQK

ALMATY. QazAqparat - QR UQK Almaty qalasy boıynsha departamenti Eýroodaq elderinen Qazaqstanǵa poshta arqyly sıntetıkalyq esirtki jetkizetin kontrabandalyq arnany uıymdastyrǵan toptyń jolyn kesti. Bul jóninde Ulttyq qaýipsizdik komıtetiniń baspasóz qyzmetine silteme jasap QazAqparat habarlaıdy.

Sonymen, 6 qarashada poshta bólimshesinde jedel-izdestirý sharalaryn júrgizý nátıjesinde 968 psıhotroptyq tabletka tabyldy. Sondaı-aq, Germanııa arqyly Nıderlandydan kontrabandalyq esirtki jetkizýge qatysy bar Almaty qalasynyń eki turǵyny - «K» jáne «D» ustaldy.

«Ustalǵan «K»-nyń turǵylyqty jeri boıynsha shamamen 1.5 kg «gashısh» esirtkisi men 30 g mefedron alyndy. Alynǵan zattar sot-hımııalyq saraptamaǵa joldandy. Esirtki quraldary men psıhotroptyq zattardy ınternet-dúken arqyly ótkizip otyrǵan» delingen habarlamada.

Osy derek boıynsha QR UQK Almaty qalasy boıynsha departamenti QK 297-baby 3-bólimi boıynsha qylmystyq is qozǵady. Ustalǵan adamdar Almaty qalalyq polıtsııa departamentiniń ýaqytsha ustaý ızolıatoryna qamaldy, sotqa deıingi tergeý jalǵasýda.