Almaty túbinde qulaǵan Fokker 100-diń ekıpajy ushaq qanatyn óńdemegen - sarapshy

NUR-SULTAN. QazAqparat – Kóliktegi oqıǵalar men ıntsıdentterdi tekserý departamentiniń dırektory Bolat Naýryzálıev 2019 jylǵy 27 jeltoqsanda Almaty qalasy áýe aılaǵynyń aýmaǵynda Bek Air áýe kompanııasynyń Fokker-100 áýe kemesine qatysty oryn alǵan avıatsııalyq oqıǵany tekserýdiń qorytyndysy boıynsha túsinikteme berdi, dep habarlaıdy QazAqparat tilshisi.

«Ekıpaj aýa raıynyń málimetterin alǵan soń. ushaqtyń ishki-syrtqy jaǵdaıyn qaraıdy. Aman qalǵan ekinshi ushqysh ushaqty ózi qarap shyqqanyn aıtady. Onyń sózimen aıtsaq, ushaq qanatyn ustap kórgende «temirdeı qurǵaq» bolǵan. «Temirdeı qurǵaq» degen sózdiń qaı maǵynada qoldanǵanyn bilmeımin, biraq týra osylaı aıtqan.

ıAǵnı, komandır ushaqtyń qanatyn óńdemeý kerek dep sheshken. Tańǵy saǵat 6.30 kezi bolǵan. Ol kezde kún qarańǵy bolýy da múmkin. Olar qanat qurǵaq dep eseptegen bolýy múmkin», - dedi Bolat Naýryzálıev Indýstrııa jáne ınfraqurylymdyq damý mınıstriliginde ótken brıfıngide.

Mamannyń aıtýynsha, halyqaralyq tájirıbede №96-40 degen qujat bar. Ushaq kókke kóteriler aldynda ony tolyq kim óńdeý kerektigi sol qujatta reglamenttelgen.

«Biraq bizde ondaı normatıv joq», - dedi Kóliktegi oqıǵalar men ıntsıdentterdi tekserý departamentiniń dırektory.

Sarapshy qazirgi tańda jeke menshik áýe kompanııalary ekıpaj múshelerin ushaqty jolǵa shyǵar kezde óńdeý boıynsha birqatar shekteýler qoıatynyn da atap ótti.

«Keıbir jeke áýe kompanııalary bul turǵyda ekpıajǵa qatty shekteýler qoıatyn jaǵdaılar bar. Óıtkeni bul shara arzan emes. Bir ushaqty tolyq óńdeýge 15 myń eýroǵa deıin shyǵyn ketýi múmkin», - dedi maman.

Brıfıng barysynda Bolat Naýryzálıev tekserý qorytyndysy shyǵarylǵanymen, naqty kimniń kináli ekenin aıtý avıtsııaǵa jaýapty organdardyń quzyretine kirmeıtinin eskertti.

«Bizdiń beretin qorytyndymyz ben usynymdar boıynsha Azamattyq avıatsııanyń «Avıatsııa ákimshiligi» mekemesi sheshim qabyldaıdy. Bul usynymdar Almaty túbindegi ushaq apaty sııaqty oqıǵalardyń qaıtalanbaýy úshin beriledi. Olardyń tarapynan eskertýler bar. Úsh jyldan beri ol eskertýlerdegi kemshilikter joıylǵan joq. Іshki ister mınıstrli,i Kólik prokýratýrasy, Avıatsııa ákimshiligi, avıatsııalyq uıymdar osy máseleni qaraıdy», - dedi ol.