Almaty tragedııasy: Búlikshiler órt sóndirýshilerdi ǵımaratqa qamap, jaǵyp jibergen
«5 qańtar kúni, saǵat 14.30-da Tótenshe jaǵdaılar departamentiniń 101-pýltine Almaly aýdany, Bógenbaı batyr kóshesi, 145 mekenjaıynda Bas prokýratýranyń Quqyqtyq statıstıka jáne arnaıy esepke alý jónindegi komıteti Almaty qalalyq basqarmasynyń ǵımaraty janyp jatqany týraly habarlama tústi. Ǵımarat ishine qyzmetkerlerdi bekitip tastaǵan, olar kómek surap aıǵaılap jatty. Búlikshilerdiń zańsyzdyqtary oryn alǵan kúrdeli jaǵdaıǵa qaramastan jáne boıdy úreı bılese de, qutqarýshylar órt ornyna shyqty», - delingen Almaty qalalyq Tótenshe jaǵdaılar departamentiniń málimetinde.
Aqparatqa súıensek, órt ornyna kiretin joldardyń ashyq-jabyǵyn TJD basshysy Rýslan Qasybaev Daǵdarystyq jaǵdaılardy basqarý ortalyǵynan baqylap, monıtorıng jasap otyrǵan. Sonyń arqasynda destrýktıvti elementterdiń belsendi zańsyzdyqtaryna qaramastan, alǵashqy órt sóndirý bólimsheleri shaqyrtý ornyna jete alǵan.
«Oqıǵa ornyna jetken kezde ǵımarat ishinde qalǵan adamdar óz betimen shyǵa almaıtyny, keıbiri shatyrǵa kóterilip ketkeni anyqtaldy. Órt sóndirýshiler soqqyǵa jyǵyla otyryp jáne órt sóndirý tehnıkasynyń qıratylýyna qaramastan, adamdardy qutqarýǵa kiristi. Avtosaty, órt sóndirýge arnalǵan qol satynyń jáne qutqarý arqandarynyń kómegimen 27 adamdy qutqaryp, 35-in evakýatsııalaý múmkin boldy.
Alaıda, apattyq-qutqarý jumystary aıaqtalǵan soń, jappaı tártipsizdikke qatysýshylar órt sóndirýshilerdi aıamaı taıaqtyń astyna alyp, ózderin sol ǵımarattyń ishine qamap tastady. Sońynda ǵımaratty qaıta jaǵyp jiberdi. Degenmen, qamalǵan órt sóndirýshiler órt sóndirýge arnalǵan sýmen qamtamasyz etýdiń ishki quralynyń kómegimen otty sóndirip, syrtqa shyǵa aldy», - delingen vedomstvo habarlamasynda.