Almaty taýlarynda týrısterge arnap 15 lashyq salynady

ALMATY. QazAqparat - Almaty mańyndaǵy taýlarda týrısterdiń turýyna arnalǵan lashyqtarda Wi-Fi paıdalanýǵa, telefondy qýattaýǵa, dári qobdıshasy men azyq-túlik jıyntyǵyn alýǵa bolady. Bul týraly onlaın brıfıng barysynda qalalyq týrızm basqarmasynyń basshysy Sabına Amankeldi málim etti, dep habarlaıdy QazAqparat tilshisi.

Basqarma basshysynyń aıtýynsha, sońǵy 3 jylda megapolıske jaqyn ornalasqan taý shatqaldaryna qala turǵyndary men qonaqtary jıi baraǵan. Taý týrızmine degen qyzyǵýshylyq ásirese pandemııa kezinde arta túsken.

«Qala ákimi Baqytjan Saǵyntaevtyń tapsyrmasy boıynsha Almaty turǵyndary men qonaqtarynyń qaýipsiz jáne jaıly demalýy úshin qajetti jaǵdaılar jasaý jospary ázirlendi.Taý baǵyttarynyń shalǵaı toraptyq ýchaskelerinde jazdyń sońyna deıin týrıster turatyn 15 lashyq salynady. Búginde daıyndyq jumystary júrip jatyr. Sondaı-aq, qutqarý otrıadtary úshin dabyl túımeleri bar 10 radıorelelik dińgek ornatylady», - dedi Sabına Amankeldi.

Sonymen qatar, lashyqta týrıster túnep, sýyq kúni jylynýǵa múmkindik alady.

Alǵashqy medıtsınalyq kómek jınaǵy, marshrýt kartalary, mobıldi telefonda qýattaıtyn qurylyǵy men jyly kórpe jáne azyq-túlik jıyntyǵy bolady.

«Qazirgi kezde taý qaýymdastyǵymen birlesip kelesi shatqaldarda lokatsııalar pysyqtalýda. Atap aıtar bolsam, orta jáne Talǵar, Kimasar, Túıik-Sý, joǵarǵy Gorelnık, Úlken Almaty shatqaly, Shúkir jáne Prohodnoe», - dedi spıker.

Jalpy, týrıstik navıgatsııanyń biryńǵaı júıesin qurý jáne taýǵa shyǵý úshin TAU Go smart-navıgatory túrindegi qosymshany iske qosý boıynsha jumys júrgizilýde, ol tqtenshe jaǵdaılar departamenti bazasymen ıntegratsııalanatyn bolady.

Kishi jáne Úlken Almaty shatqaldarynda taý qutqarýshylarynyń jasaǵy táýlik boıy kezekshilik etedi, sondaı-aq «Tuıyqsý» shatqalynda tikushaq alańy uıymdastyrylady.

Onyń aıtýynsha, týrızm basqarmasy júıeli negizde baǵyttardy abattandyrýda.

Búginde 500 shaqyrym jol abattandyrylyp, 1000 shaqyrym taý joldary tsıfrlandyryldy.

«Baǵyttar boıynsha 26 aqparattyq stend, 154 kórsetkish, 80 aqparattyq qalqan, 14 aqparattyq baǵan, 163 oryndyq jáne 68 kúrke ornatyldy. Barlyq navıgatsııalyq stendterde QR-kodtary bar, onda týrıster marshrýttyń kúrdeliligimen, onyń uzaqtyǵymen jáne ótý ýaqytymen tanysa alady», - dep atap ótti ol.

Bıyl jalpy uzyndyǵy 172 shaqyrym bolatyn Úlken jáne Kishi Almaty shatqalyndaǵy jaıaý taý joldary qosymsha abattandyrylady.

Aıta keteıik, jyl basynan beri taýdaǵy jedel-qutqarý jasaǵynyń mamandary 26 adamdy qutqardy.