Almaty taýlarynda ot jaqqandarǵa 4,1 mln teńge aıyppul salyndy

ALMATY. QazAqparat- Almaty qalalyq tótenshe jaǵdaılar departamenti men polıtsııa, orman sharýashylyǵy mekemeleriniń qyzmetkerleri demalys jáne mereke kúnderi taýly aımaqtarda órttiń aldyn alý maqsatynda reıdtik is-sharalar ótkizýde, dep habarlaıdy QazAqparat tilshisi.

Almaty taýlarynda 57 birlesken reıd júrgizildi. Onyń barysynda 5 myń demalýshyǵa jadynama taratyldy. Sonymen qatar erekshe qorǵalatyn aımaqtarda órt jaǵýdyń 100 faktisiniń joly kesildi.

Vedomstvonyń málimetinshe, 43 tulǵaǵa eskertý túrinde 5 hattama toltyryldy. Eki adam 505-babynyń 2-bóligi boıynsha 34500 teńge aıyppul arqalady, taǵy 11 adamǵa QR Ákimshilik quqyq buzý kodeksiniń 367-baby boıynsha jalpy somasy 4 140 000 aıyppul salyndy.

Almaty qalasy Tótenshe jaǵdaılar departamenti bastyǵynyń orynbasary Samat Asaıynov erekshe qorǵalatyn tabıǵı aımaqtardyń aýmaqtarynda jáne arnaıy belgilenbegen jerlerde órt tutandyrǵany úshin orman sharýashylyǵy mekemeleriniń qyzmetkerleri Qazaqstan Respýblıkasynyń «Ákimshilik quqyq buzýshylyq týraly» Kodekstiń 367-babyna sáıkes ákimshilik aıyppul salýǵa quqyly ekenin eske saldy.

Jeke tulǵalarǵa salynatyn aıyppul mólsheri 100 AEK-quraıdy, ózge de aýyr jaǵdaılarda qylmystyq jaýapkershilik qarastyrylǵan.

Aıta keteıik, Іle Alataýy ulttyq parkinde ystyq tamaq daıyndaý úshin arnaıy jabdyqtalǵan 14 oryn, Alma-Arasan shatqalynyń aýmaǵynda - 12 oryn, «Býtakovkada» - 2 oryn bar.