Almaty taýlarynda ot jaqqandarǵa 1,3 mln teńge aıyppul salyndy

ALMATY. QazAqparat - Almatyda Іle Alataý ulttyq parkinde ot jaqqan tórt adam ákimshilik jaýapqa tartyldy, dep habarlaıdy Qazaqparat tilshisi.

Qalalyq TJD baspasóz qyzmeti málimetinshe, Almaty taýlarynda 45 birlesken reıd júrgizildi. Onyń barysynda demalýshylarǵa jadynama taratylǵan.

Sonymen qatar erekshe qorǵalatyn aımaqtarda órt jaǵýdyń 4 faktisiniń joly kesildi.

«4 jeke tulǵaǵa QR Ákimshilik quqyq buzý kodeksiniń 367-baby boıynsha jalpy somasy 1 380 000 aıyppul salyndy. Sondaı-aq, tabıǵat qorǵaý polıtsııasy 505-bap boıynsha eskertý túrinde 5 hattama toltyrdy»,- dep habarlady vedomstvodan.

Almaty qalasynyń aýmaǵynda Іle Alataýy ulttyq parkiniń 20 myń 805 gektary bar.

Tabıǵı órttiń aldyn alý úshin Almaty qalasy TJ jáne polıtsııa departamentiniń qyzmetkerlerinen turatyn mobıldi toptar jumys isteıdi.

Bul qyzmetke orman sharýashylyǵy mekemeleriniń salt atty qyzmetkerleri qolushyn sozyp, eriktiler de qatysty.

Bul toptar órt tutanýy yqtımal degen «ystyq» aımaqtardy tekseredi.

Reıd kezinde teplovızormen jáne qulaqtandyrý júıesimen jaraqtandyrylǵan drondar, qulaqtandyrý avtomobılderi qoldanylady.

Qala aýmaǵynda ornalasqan tabıǵı parkter «erekshe qorǵalatyn tabıǵı aýmaq» mártebesine ıe.

«Tabıǵatta ashyq ottyń jaǵylýyna jol bermeý óte mańyzdy. Qurǵaq shóp pen qoqysty órtemeńiz. Qurǵaq shópti ádeıi órteıtin adamdar tabıǵatqa qaýip tóndiredi. Mysaly, jeke aýlanyń ıeleri men baǵbandar ystyq kúnnen keýip qalǵan shóp pen qoqysty órtep jiberedi», – dedi qalalyq departamentte.

Aıta keteıik, Іle Alataýy ulttyq parkinde ystyq tamaq daıyndaý úshin arnaıy jabdyqtalǵan 14 oryn, Alma-Arasan shatqalynyń aýmaǵynda - 12 oryn, «Býtakovkada» - 2 oryn bar.