Almaty taýlarynda ot tutatqandarǵa 5 mln teńge aıyppul salyndy

ALMATY. QazAqparat – Almaty taýlarynda ot jaqqan 100 adam ákimshilik jaýapqa tartyldy. Bul týraly óńirlik kommýnıkatsııalar qyzmetinde ótken baspasóz máslıhatynda qalalyq Tótenshe jaǵdaılar departamentiniń memlekettik órt baqylaý basqarmasynyń basshysy Danııar Júsipov málim etti, dep habarlaıdy Qazaqparat tilshisi.

«Taýly ormandy jerlerde órttiń aldyn alý maqsatynda 90-nan astam birlesken reıd júrgizildi. Onyń barysynda 7 myńnan astam demalýshyǵa jadynama taratyldy. 170 - ten astam ot jaǵý faktisi toqtatyldy, jalpy somasy 5 mln teńgeden astam somaǵa 100 jeke tulǵa ákimshilik jaýapkershilikke tartyldy», - deıdi ol.

Spıkerdiń sózinshe, kún raıyna baılanysty Almatyda órt qaýpi saqtalyp otyr.

«Jaz tabıǵı órttiń paıda bolý qaýpi aıtarlyqtaı artatyn ýaqyt ekeni bárińizge belgili. Olar qorshaǵan ortaǵa, ekonomıkaǵa jáne adamdardyń densaýlyǵyna eleýli zııan keltirýi múmkin. Aýa raıy boljamyna sáıkes, shilde aıynyń sońynda temperatýra 40 gradýsqa deıin kóteriletin ystyq aýa raıy kútiledi. Búginde «Qazgıdromet» 2023 jylǵy 23 shildeden beri tótenshe órt qaýpin saqtalatynyn aıtyp, shuǵyl eskertý jasap jatyr», - deıdi Danııar Júsipov.

Departament ókili taýly jerde shylym shegip, ot jaqpaýǵa keńes berdi.

Aıta keteıik, Іle Alataý ulttyq parkinde ystyq tamaq daıyndaý úshin arnaıy jabdyqtalǵan 14 oryn, Alma-arasan shatqalynyń aýmaǵynda -12 oryn, «Býtakovkada» 2 oryn bar.