Almaty taýlarynda muzdyqtar erip jatqan joq – qalalyq TJD

ALMATY. QazAqparat - Almaty taýlarynda muzdyqtardyń erý protsesi baıqalmaıdy. Bul týraly qala mańyndaǵy taýlarǵa aerovızýaldy sholý júrgizý barysynda belgili boldy, dep habarlaıdy QazAqparat tilshisi.

Almaty qalasynyń tótenshe jaǵdaılar departamentinen málim etkendeı, Almaty qalalyq TJD, «Qazseldenqorǵaý» MM, «Qazgıdromet» RMK Almaty qalasy boıynsha fılıalynyń mamandary shahar mańyndaǵy taýlardy keshendi baǵalaý maqsatynda aerovızýaldy tekserý júrgizdi.

«Taýlarda muzdyqtardyń ablıatsııa (erý) protsesi baıqalmaıdy. Barlyq morenalyq kólder qysqy rejımde bolýyna baılanysty qala turǵyndary men ınfraqurylymyna qaýip tóndirmeıdi»,-delingen departament habarlamasynda.

Aıta keteıik, aerovızýaldy sholý teńiz deńgeıinen 800-4200 metr bıiktikte ótti. Іle Alataýy jotasy ózenderiniń basseınderi boıynsha Aqsaıdan Túrgenge deıingi bıik taýly morenalyq kólder men muzdyqtardyń, sel oıyqtary men oshaqtarynyń jaı-kúıi zertteldi.

Almaty qalalyq TJD taýly jerlerde qar kóshkininiń baıqalýyna baılanysty azamattarǵa taý baýraılaryna shyqpaýdy eskertti.

Eske salaıyq, keshe Kishi Almaty shatqalynda jaraqattanǵan jasóspirim qutqarylǵanyn jazǵan bolatynbyz.

Sondaı-aq jaqynda Almaty taýlarynda qar kóshkini júrip, qar astynda Frantsııa azamaty qaza tapty.