Almaty taýlarynda qys bastalǵaly 35 márte qar kóshkini júrgen

ALMATY. QazAqparat - Almatyda halyq pen nysandardy qorǵaý maqsatynda 7 márte qar túsirildi. Sondaı-aq, qar kóshkininiń qaýipti kezeńi bastalǵaly beri taýdan 35 márte qar túsken (39100 tekshe metr). Bul týraly óńirlik kommýnıkatsııalar qyzmeti alańynda «Qazseldenqorǵaý» MM Almaty fılıalynyń ókili Samat Dáýlenkanov aıtty, dep habarlaıdy QazAqparat tilshisi.

Spıkerdiń málimetinshe, profılaktıkalyq túsirilgen qardyń jalpy aýdany 2460 tekshe metrdi qurady.

«Búgin tańǵy saǵat 07.00-degi jaǵdaı boıynsha Kishi Almaty ózeni alabynda qar jamylǵysynyń bıiktigi: Medeý bógeti aýdanynda - 36 sm, Myńjylqy - 50 sm, Qotyrbulaq ózeni alabynda 69-120 sm. Úlken Almaty ózeni alaby boıynsha qar jamylǵysynyń bıiktigi 9-dan 78 sm-ge deıin. Aqsaı jáne Qarǵaly ózeni alabynda qar jamylǵysynyń bıiktigi – 4 sm, Aqsaı-Aqjar baqylaý beketinde - 6 sm», - dedi Samat Dáýlenkanov.

Ol meteorologııalyq, qar kóshkini jaǵdaıy ózgergen jaǵdaıda jáne qar túrinde qatty jaýyn-shashyn kezinde qar kóshkini júrýi múmkin ekenin aıtty.

«Qar kóshkininiń aldyn alý úshin ortalyq apparattyń usynysymen blokpostar qoıylyp jatyr. «Medeý-Shymbulaq» jáne «Almaty-ÚAK» avtojoldaryna, basqa da qaýipti aımaqtardaǵy joldar qar kóshkini qaýpi jaǵdaıynda jabylyp, blokpost qoıylýda. «Qazseldenqorǵaý» MM Almaty qalalyq paıdalaný-tehnıkalyq basqarmasynda 32 adam, 21 arnaıy tehnıka daıyn tur», - dedi spıker.

Sondaı-aq onyń milimetinshe, qazirgi ýaqytta qyzmet kórsetý aımaǵy boıynsha topyraqtyń qatýy: Úlken Almaty ózeni alabynda – 10 sm, Kishi Almaty ózeni alabynda – 28 sm, Aqsaı ózeni alabynda – 20 sm, Qarǵaly ózeni alabynda – 18 sm.