Almaty taýlarynda Qazaqstan men Úndistan áskerıleri jattyǵý ótkizip jatyr

NUR-SULTAN. QazAqparat - Taý daıyndyǵy ortalyǵynda alpınıstik jabdyqtardy durys qoldaný, qozǵalys tehnıkasy jáne taýly jerlerde urys júrgizý taktıkasy boıynsha jattyǵý sabaqtary ótkizilip jatyr. Jıynǵa Úndistan Respýblıkasy Qarýly kúshteriniń áskerı qyzmetshileri nusqaýshy retinde kelgen, dep habarlaıdy QazAqparat QR Qorǵanys mınıstrliginiń baspasóz qyzmetine silteme jasap.

«Jıynnyń maqsaty – áskerı qyzmetshilerdiń taýly jerlerde saýatty is-qımyl jasaý qabiletin tekserý, áskerı alpınısterdiń taý kedergilerin eńserý daǵdylaryn jetildirý, áskerı qyzmetshilerdiń fızıkalyq turǵyda tózimdilik deńgeıin arttyrý», - delingen vedomstvo málimdemesinde.

Jaýyngerlerge alpınıstik jabdyqtarmen jumys isteý, taýdaǵy jartasty jáne muzdy ýchaskelerdi eńserý boıynsha tájirıbelik sabaqtar ótkiziledi. Jıyn barysynda Іle Alataýynyń shyńdaryna kóterilý josparlanǵan.

«Úndistan Qarýly kúshterimen taý daıyndyǵy salasyndaǵy yntymaqtastyq 2005 jyldan beri júrgizilip keledi. Qazaqstandyq jaýyngerler úndi tarapynyń shaqyrýymen tájirıbe almasý maqsatynda 2005 jyly bıiktigi 7134 metr Nýn shyńyna, 2010 jyly 6400 metr bıiktiktegi Bagerathı shyńyna birge kóterilgen bolatyn. 2018 jyldan beri úndi áskerı nusqaýshylary jyl saıyn tájirıbe almasý úshin Qazaqstan Qarýly kúshteriniń taý daıyndyǵy ortalyǵyna kelip turady», - dep tolyqtyrady mınıstrliktiń baspasóz qyzmeti.

Buǵan deıin Qazaqstan men Reseı órt sóndirýshileri birlesken jattyǵý ótkizip jatqany habarlanǵan bolatyn.