Almaty taýlarynda qar kóshkini júrý qaýpine baılanysty blok beketter qoıyldy
Almaty qalalyq tótenshe jaǵdaılar departamentiniń málimetinshe, taýly aımaqtarda qar jamylǵysy turaqsyz, qardyń qalyń (keıbir jerlerde 100-120 sm) bolýyna baılanysty taý betkeılerinde kóshkin júrý qaýpi bar.
«Turǵyndardyń qaýipsizdigin qamtamasyz etý maqsatynda «Kazseldenqorǵaý» mamandary «Medeý» bógetinen joǵary Shymbulaq - Edelveıs tasjolynyń bóliginde blok beketter ornatty. Taýly aımaqtardaǵy qar kóshkinderi - asa qaýipti tabıǵı qubylys. Qar kóshkinderiniń maksımaldy jyldamdyǵy saǵatyna 80 shaqyrymǵa deıin jetýi múmkin», - delinedi TJD habarlamasynda.
Sondaı-aq, TJD málimetinshe, 24 qarashadan bastap Almaty taýlarynda 14 ret ózdiginen túsken qar kóshkini tirkeldi. Zardap shekkender bolǵan joq.
«Mamandar profılaktıkalyq túsirýdi «Qazgıdromet» RMK usynymdary negizinde, aýa raıy qolaıly bolǵan jaǵdaıda júrgizedi. «Qazgıdromet» RMK jáne «Qazseldenqorǵaý» MM beketteri qar kóshkini jaǵdaıyna turaqty monıtorıng jasap otyr. Almaty óńirinde 165 kóshkin alqaby bar, onyń 18-i «Medeý» sport kesheni, «Shymbulaq» taý-shańǵy kýrorty jáne Úlken Almaty kóli aýdandarynda ornalasqan», - dep habarlady qalalyq TJD-dan.
Almaty qalalyq TJD qala turǵyndary men qonaqtaryn taýly betkeılerge shyǵýdan bas tartýdy surady.
Foto: media.publika.md