Almaty taýlarynda adasyp ketken Grekııa azamaty qutqaryldy

ALMATY. QazAqparat- «Volchıa gora» shyńynda adasyp ketken 55 jastaǵy Grekııa azamaty tabyldy, dep habarlaıdy QazAqparat tilshisi.

Almaty qalasynyń qutqarý qyzmetiniń málimetinshe, «109» nómirine 8 maýsym kúni saǵat 21:37- de Grekııa azamaty G. «Volchıa goraǵa» shyǵyp, sol kúıi oralmaǵany týraly habar tústi.

«1968 jyly týǵan týrıstiń joǵalyp ketkeni týraly aqparatty ol turaqtaǵan hosteldiń ıesi habarlady. Aıtýynsha, týrıst onyń telefonyna ornalasqan jeri men «qaıtar joldan adasqany» jaıly habarlama jibergen»,- dep atap ótti Almaty qalasynyń qutqarý qyzmetinen.

Qutqarý qyzmetiniń qutqarýshylary sońǵy geomálimet boıynsha izdestirý jumystaryn júrgizip, túngi saǵat 01:11-de joǵalǵan azamatty taýyp, taýdan túsirdi. Týrıst din aman, medıtsınalyq kómek qajet bolmady.